​कोलकाता: बाह्रौँ अन्तर्राष्ट्रिय योग दिवसको अवसरमा आइतबार कोलकाताको ऐतिहासिक रेड रोडमा एक भव्य सामूहिक योग कार्यक्रमको आयोजना गरिएको छ। उक्त विशेष समारोहमा भारतका प्रधानमन्त्री नरेन्द्र मोदीले मुख्य अतिथिका रूपमा सहभागिता जनाउनुभएको छ। कार्यक्रममा पश्चिम बङ्गालका मुख्यमन्त्री सुभेन्दु अधिकारी, राज्यपाल आरएन रवि, राज्य सरकारका मन्त्रीहरू, विधानसभा अध्यक्ष रथिन्द्रनाथ बसु, विधायकहरू, खेलाडीहरू, विभिन्न सङ्गठनका प्रतिनिधिहरू तथा हजारौँ विद्यार्थी र योग अभ्यासकर्ताहरूको ठूलो उपस्थिति रहेको थियो। प्रधानमन्त्रीको भ्रमण र मुख्य समारोहलाई मध्यनजर गर्दै कोलकाताभरि बहुस्तरीय एवं कडा सुरक्षा व्यवस्था मिलाइएको थियो।

आइतबार बिहानै रेड रोड पुग्नुभएका प्रधानमन्त्री मोदीले मञ्चबाट सम्पूर्ण देशवासीलाई अन्तर्राष्ट्रिय योग दिवसको शुभकामना व्यक्त गर्नुभयो। सम्बोधनका क्रममा उहाँले जुन २१ तारिख पृथ्वीको कुनै एक भागमा वर्षकै सबैभन्दा लामो दिन हुने भए पनि यसले अन्तर्राष्ट्रिय योग दिवसको मान्यता पाएपछि यस दिनको महत्त्व विश्वभर अझ बढेको उल्लेख गर्नुभयो। योगले संसारका सम्पूर्ण मानिसहरूलाई एकापसमा जोड्ने काम गरेको भन्दै प्रधानमन्त्री मोदीले आज यो दिवस विश्वकै सबैभन्दा ठूलो सांस्कृतिक उत्सवका रूपमा परिणत भएको धारणा राख्नुभयो। योग भारतको प्राचीन परम्परा भए तापनि अहिले यो सम्पूर्ण विश्वकै आधुनिक जीवनशैलीको अभिन्न हिस्सा बनिसकेको उहाँको भनाइ थियो। उहाँले योगको ऊर्जा र प्रभाव भारतमा हिमालयदेखि हिन्द महासागरसम्म र उत्तरपूर्वको बङ्गालदेखि पश्चिमको सौराष्ट्रसम्म प्रष्ट रूपमा देख्न सकिने बताउँदै कोलकातामा आयोजित यस विशेष समारोहमा सहभागी हुन पाउनु आफ्ना लागि सौभाग्य भएको उल्लेख गर्नुभयो।
​पश्चिम बङ्गालको समृद्ध आध्यात्मिक र सांस्कृतिक सम्पदाको स्मरण गर्दै प्रधानमन्त्री मोदीले यो भूमि श्री अरबिन्दो, स्वामी विवेकानन्द र श्री रामकृष्ण परमहंस जस्ता महान् विभूतिहरूको क्रिडास्थल रहेको बताउनुभयो। उहाँले श्री अरबिन्दोका विचारहरूलाई उद्धृत गर्दै योग वास्तवमा मानव चेतनालाई जोड्ने सर्वोत्तम मार्ग भएको स्पष्ट पार्नुभयो। योग दिवसको सफल आयोजनाका लागि कोलकाताका नागरिकहरूले स्वच्छता, व्यवस्थापन र नागरिक कर्तव्यको पालनामा देखाएको उत्साह एवं सहयोगको उहाँले उच्च प्रशंसा गर्नुभयो। योगलाई केवल एक दिनको औपचारिकतामा सीमित राख्न नहुनेमा जोड दिँदै प्रधानमन्त्रीले यसलाई दैनिक जीवनको हिस्सा बनाउन आग्रह गर्नुभयो। मानसिक र शारीरिक स्वास्थ्यलाई सन्तुलित राख्न योग अपरिहार्य रहेको भन्दै उहाँले श्रीमद्भगवद्गीतामा पनि श्रीकृष्णले योगको महत्त्व व्याख्या गरेको स्मरण गर्नुभयो। समाज स्वस्थ भए मात्र देश स्वस्थ र समृद्ध हुने उहाँको दृढता थियो।
​समारोहमा पश्चिम बङ्गालका मुख्यमन्त्री सुभेन्दु अधिकारीले प्रधानमन्त्री मोदीलाई स्वागत गर्दै राज्यमा योगको ऐतिहासिक परम्परा रहेको उल्लेख गर्नुभयो। प्रधानमन्त्रीको गरिमामयी उपस्थितिले यस वर्षको योग दिवसलाई ऐतिहासिक बनाएको भन्दै उहाँले विगतमा सरकारी स्तरबाट खासै पहल नभए पनि अहिले जनतामा योगप्रति अभूतपूर्व उत्साह जागेको दाबी गर्नुभयो। मुख्यमन्त्री अधिकारीका अनुसार यसपटकको योग कार्यक्रमका लागि मात्रै २५ लाखभन्दा बढी मानिसहरूले अनलाइन दर्ता गराएका थिए।

आइतबार बिहान ६:३० बजेदेखि सुरु भएको मुख्य योग अभ्यासमा रेड रोडमा मात्रै करिब ३५ हजार मानिसहरूले सामूहिक रूपमा योग आसन र प्राणायाम गरेका थिए। टाढा-टाढाबाट आउने सहभागीहरूको सुविधाका लागि कोलकाता मेट्रोले आइतबार बिहान ४ बजेदेखि नै विशेष सेवा सञ्चालन गरेको थियो। व्यापक प्रशासनिक तयारी, हजारौँको स्वतःस्फूर्त सहभागिता र प्रधानमन्त्रीको उपस्थितिका बिच कोलकाताको यो भव्य कार्यक्रम सफलतापूर्वक सम्पन्न भएको छ।