मध्य र पूर्वी युरोपले अहिले ठूलो बाढीको सामना गरिरहेको छ। बाढीका कारण धेरै देश र हजारौं मानिस प्रभावित भएका छन्। अस्ट्रियामा बाढीबाट मानिसहरूलाई बचाउनको लागि उद्धार कार्य जारी राख्दा एक फायर फाइटरको ज्यान गएको छ। पोल्याण्डमा पनि एक जनाको मृत्यु भएको छ। रोमानियामा भीषण वर्षा र बाढीका कारण पाँच जनाको मृत्यु भएको समाचार छ। चेक गणतन्त्रमा मृत्युको सही तथ्याङ्क अझै थाहा छैन। अस्ट्रियाको राजधानी भियनासँग जोडिएको प्रान्तलाई ‘प्रकोप क्षेत्र’ घोषणा गरिएको छ। त्यहाँका नेताहरूले यसलाई अप्रत्याशित र डरलाग्दो अवस्था भनेका छन्। पोल्याण्डका प्रधानमन्त्री डोनाल्ड टस्कले बाढीका कारण प्राकृतिक प्रकोपको अवस्था घोषणा गरेका छन्। चेक रिपब्लिकले पनि भारी वर्षाको सामना गरिरहेको छ। वास्तवमा कतिपय क्षेत्रमा तीन महिनाको वर्षा मात्रै तीन दिनमा परेको छ।