रुसी ब्यालेस्टिक क्षेप्यास्त्र आक्रमणमा परी २२ जनाको मृत्यु

नयाँ दिल्ली: ​रुसले युक्रेनमाथि गरेको भीषण मिसाइल तथा ड्रोन आक्रमणमा परी राजधानी किभ र आसपासका क्षेत्रमा कम्तीमा २२ जनाको ज्यान गएको छ। सोमबार भएको यस ठुलो हमलामा रुसले ६८ मिसाइल र ३५१ वटा स्ट्राइक ड्रोन प्रयोग गरेको थियो, जसमध्ये युक्रेनी वायुसेनाले ३७ मिसाइल र ३२६ ड्रोनलाई भने सफलतापूर्वक खसालेको थियो। तर, इन्टरसेप्टर मिसाइल र एयर डिफेन्स ब्याट्रीको गम्भीर अभावका कारण किभतर्फ प्रहार गरिएका २३ वटा ब्यालेस्टिक क्षेप्यास्त्रमध्ये एउटैलाई पनि रोक्न नसकिएको वायुसेनाले स्वीकार गरेको छ। यस आक्रमणबाट किभका तीनवटा ठुला भवनहरू आंशिक रूपमा भत्किएका छन् भने ७ बालबालिकासहित ५६ जनाभन्दा बढी घाइते भएका छन्।
​अमेरिकी निर्मित पेट्रियट इन्टरसेप्टर मिसाइलको अभावका कारण नागरिकहरू असुरक्षित भइरहेको भन्दै युक्रेनी राष्ट्रपति वोलोदिमिर जेलेन्स्कीले गम्भीर चिन्ता व्यक्त गर्नुभएको छ। उहाँले सहयोगी राष्ट्रहरूको स्टक (भण्डार) मा मात्र डिफेन्स मिसाइलहरू रहिरहेसम्म मस्कोले आवासीय क्षेत्रहरूमा आक्रमण गरिरहने चेतावनी दिनुभएको छ। राष्ट्रपति जेलेन्स्कीले यसै हप्ता टर्कीमा हुन गइरहेको ३२ सदस्य राष्ट्रहरूको नाटो शिखर सम्मेलनमा युक्रेनलाई तत्काल थप एयर डिफेन्स प्रणाली उपलब्ध गराउने विषयलाई मुख्य एजेन्डा बनाउन र ठोस निर्णय लिन आफ्ना सहयोगी मुलुकहरूसँग जोडदार अपिल गर्नुभएको छ।