नयाँ दिल्ली: ​प्रधानमन्त्री नरेन्द्र मोदी आफ्नो तीन देशको औपचारिक भ्रमणको सिलसिलामा इन्डोनेसियाको राजधानी जकार्ता आइपुग्नुभएको छ, जहाँ उहाँलाई राष्ट्रपति प्रोबोभो सुबियान्तोले विमानस्थलमा भव्य स्वागत गर्नुभयो। भ्रमणको दोस्रो दिन जकार्तास्थित राष्ट्रपति भवनमा प्रधानमन्त्री मोदीलाई विशेष ‘गार्ड अफ अनर’ सहित औपचारिक स्वागत गरिएको थियो। त्यसलगत्तै दुई देशका राष्ट्रप्रमुखबीच भएको उच्चस्तरीय वार्तामा रक्षा, प्रविधि, व्यापार र समुद्री कनेक्टिभिटीलाई सुदृढ बनाउने उद्देश्यले ५ वटा महत्त्वपूर्ण सम्झौतामा हस्ताक्षर भएको छ।
​यस ऐतिहासिक वार्ताका क्रममा भारत र इन्डोनेसियाबीच ब्रह्मोस क्षेप्यास्त्र आपूर्ति बढाउने सहमति भएको छ भने इन्डोनेसियाले भारतको आधुनिक ‘अस्त्र’ क्षेप्यास्त्र समेत खरिद गर्ने निर्णय गरेको छ। रणनीतिक सुरक्षाका दृष्टिकोणले निकै महत्त्वपूर्ण मानिएको मलक्का स्ट्रेट नजिकै अवस्थित ‘सबाङ बन्दरगाह’ को विकास दुवै देशले मिलेर गर्ने सहमति गरेका छन्, जुन भारतको ग्रेट निकोबार बन्दरगाह परियोजनाबाट मात्र १०० माइलको दूरीमा छ। यसका साथै इन्डोनेसियाको निर्वाचन प्रणालीलाई सघाउन भारतले त्यहाँको आवश्यकता अनुसारको विशेष इलेक्ट्रोनिक भोटिङ मेसिन (ईभीएम) निर्माण गरिदिने भएको छ भने खनिज आपूर्ति प्रणालीलाई बलियो बनाउन इन्डोनेसियाको स्टिल, निकेल र ‘रेयर अर्थ परमानेंट म्याग्नेट’ उत्पादन क्षेत्रमा भारतले ठूलो लगानी गर्ने घोषणा गरेको छ। इन्डोनेसियाको यो सफल भ्रमण सम्पन्न गरी प्रधानमन्त्री मोदी आफ्नो अर्को गन्तव्य अस्ट्रेलिया र त्यसपछि न्युजिल्यान्डतर्फ प्रस्थान गर्नुहुनेछ।