जिनेभामा पाकिस्तानी सेना प्रमुख आसिम मुनीरको हत्या गर्ने थियो योजना, पाकिस्तानले दियो ‘नक्साबाट मेटाइदिने’ धम्की!

​नयाँ दिल्ली: अन्तर्राष्ट्रिय कूटनीति र गुप्तचर संसारबाट यसबेला एउटा अत्यन्तै ठूलो र अचम्मको समाचार बाहिर आएको छ। ब्राजिलका एक खोजी पत्रकार एवं भू-राजनीतिक विज्ञ पेपे एस्कोबारले इजरायलको गुप्तचर निकाय ‘मोसाद’ ले पाकिस्तानी सेना प्रमुख फिल्ड मार्शल आसिम मुनीर र उनको सम्पूर्ण प्रतिनिधिमण्डलको हत्या गर्ने एउटा भयानक षड्यन्त्र रचेको दाबी गरेका छन्। यो योजना तब कार्यान्वयन गर्ने तयारी थियो, जब पाकिस्तानी सेना प्रमुख इरान शान्ति वार्ताको सिलसिलामा स्विट्जरल्याण्डको जिनेभा सहरमा उपस्थित थिए।
​बेन्जामिन नेतन्याहूको प्रत्यक्ष आदेशमा बनेको थियो योजना
​खोजी पत्रकार पेपे एस्कोबारले एउटा इन्टरनेट संवादका क्रममा यो सनसनीपूर्ण खुलासा गरेका हुन्। उनका अनुसार इजरायलका प्रधानमन्त्री बेन्जामिन नेतन्याहूको प्रत्यक्ष निर्देशनमा मोसादले यस घातक आक्रमणको तयारी गरिरहेको थियो। त्यस समय जिनेभामा अमेरिका र इरानबीच कूटनीतिक वार्ता चलिरहेको थियो, जसको नेतृत्व अमेरिकी तर्फबाट उपराष्ट्रपति जेडी वेन्स र इरानको तर्फबाट विदेश मन्त्री अब्बास अराघचीले गरिरहेका थिए। पाकिस्तान यस वार्तामा मध्यस्थकर्ताको भूमिकामा रहेको थियो।
​पाकिस्तानी सैन्य गुप्तचर निकायले पायो सुइँको
​दाबी अनुसार, इजरायलको यस खतरनाक षड्यन्त्रको सुइँको पाकिस्तानी सैन्य गुप्तचर विभागले पाएको थियो। उनीहरूले एउटा अत्यन्तै गोप्य र विश्वसनीय सूचनालाई बीचमै समात्न (इन्टरसेप्ट गर्न) सफल भएका थिए। स्विट्जरल्याण्डको भूमिमा आफ्ना सेना प्रमुखलाई समाप्त पार्ने तयारी भइरहेको थाहा पाउनासाथ पाकिस्तानी सैन्य वृत्तमा खलबली मच्चिएको थियो।
​ओमानमार्फत इजरायललाई अन्तिम चेतावनी: ‘नक्साबाटै मेटाइदिनेछौँ’
​एस्कोबारले बताए अनुसार षड्यन्त्रको रहस्य खुल्ने बित्तिकै पाकिस्तानले कूटनीतिक मध्यस्थकर्ताहरूको सहयोग लियो। उनले भने:
​”पाकिस्तानी अधिकारीहरूले खाडी मुलुक ओमानमार्फत इजरायललाई अत्यन्तै कडा र सीधा सन्देश पठाए। उक्त सन्देशमा स्पष्ट भनिएको थियो- ‘यदि तिमीहरूले हाम्रा सेना प्रमुख वा प्रतिनिधिमण्डलका कुनै पनि सदस्यलाई छोयौ भने, हामी इजरायललाई संसारको नक्साबाटै मेटाइदिनेछौँ।’ त्यसपछि इजरायल पछि हट्न बाध्य भयो।”
​यद्यपि, यो अत्यन्तै संवेदनशील दाबी भएकाले अहिलेसम्म न त पाकिस्तान सरकारले न त इजरायल सरकारले नै यसमा कुनै आधिकारिक प्रतिक्रिया दिएका छन्। यस दाबीको स्वतन्त्र पुष्टि हुन अझै बाँकी छ।