​गान्तोक: सिक्किमका मुख्यमन्त्री प्रेमसिंह तामाङले नेपालकी व्यावसायिक महिला फुटबल खेलाडी प्रिती राई र सिक्किमको ताशिदिङ निवासी स्थानीय फुटबल खेलाडी प्रिया क्षेत्रीसँग शिष्टाचार भेटघाट गरेका छन्। मुख्यमन्त्री तामाङले आफ्नो सरकारी निवासमा उनीहरूलाई स्वागत गर्दै दुवै खेलाडीको खेलप्रतिको समर्पण र उपलब्धिको उच्च प्रशंसा गरे।
​भेटघाटपछि सामाजिक सञ्जालमार्फत आफ्ना भावनाहरू साझा गर्दै मुख्यमन्त्रीले दुवै युवा खेलाडीहरू समाज र नयाँ पुस्ताका लागि प्रेरणाको स्रोत भएको उल्लेख गरे।
​”नेपालकी व्यावसायिक फुटबल खेलाडी प्रिती राई र हाम्रै सिक्किमको ताशिदिङकी स्थानीय फुटबलर प्रिया क्षेत्रीसँग मेरो सरकारी निवासमा भेट गर्न पाउँदा अत्यन्तै खुसी लागेको छ। फुटबलको क्षेत्रमा उनीहरूको जोश, समर्पण र उपलब्धिहरू साँच्चै नै प्रेरणादायी छन्,” मुख्यमन्त्रीले भनेका छन्।
​मुख्यमन्त्रीले दुवै खेलाडीको उज्ज्वल भविष्यको कामना गर्दै उनीहरू आगामी दिनमा खेल क्षेत्रमा अझ नयाँ उचाइमा पुग्ने विश्वास व्यक्त गरे। खेल र खेलाडीहरूलाई प्रोत्साहन दिने नीति अन्तर्गत मुख्यमन्त्रीले यस भेटलाई विशेष महत्त्व दिएका छन्।