उत्तर बङ्गलाको कृषि क्रान्तिका लागि नयाँ पहल

​सिलगढी: माटीगढास्थित उत्तर बङ्गला विज्ञान केन्द्र (नॉर्थ बंगाल साइनस सेंटर) मा आज “काञ्चनजङ्घा एग्रिप्रिन्युअर्स मिट” (कृषि-उद्यमी सम्मेलन) भव्य रूपमा सम्पन्न भएको छ। उक्त विशेष कार्यक्रममा माननीय पञ्चायत एवं ग्रामीण विकास, कृषि बजार र पशु संसाधन विकास मन्त्री श्री दिलीप घोषज्यूको गरिमामय उपस्थिति रहेको थियो। उक्त कार्यक्रममा भाग लिएपछि दार्जिलिङ क्षेत्रका लोकप्रिय लोकसभा सांसद श्री राजु विष्टले आफ्नो आधिकारिक फेसबुक पेजमार्फत यसको विस्तृत विवरण साझा गर्नुभएको छ।
​सांसद विष्टका अनुसार, यस सम्मेलनमा दार्जिलिङ पहाड, तराई, डुवार्स, उत्तर बङ्गलाका साथै छिमेकी मुलुक भुटान र नेपालका प्रगतिशील कृषकहरू, कृषि-उद्यमी, वैज्ञानिकहरू, प्रविधि आविष्कारकहरू, उत्पादक समूहहरू, सामाजिक उद्यमीहरू र विकासकर्मीहरूको बाक्लो उपस्थिति रहेको थियो। यस क्षेत्रमा कृषिको भविष्यलाई नयाँ दिशा दिनका लागि यो जुझारु समुदाय एउटै थलोमा भेला भएको कुरा उहाँले बताउनुभयो।
​”हाम्रो मुख्य उद्देश्य दार्जिलिङ पहाड, तराई र डुवार्स लगायत समग्र उत्तर बङ्गला क्षेत्रको कृषि अर्थतन्त्रलाई मजबुत बनाउनुका साथै दिगो र समावेशी ग्रामीण विकासलाई बढावा दिनु हो,” सांसद विष्टले आफ्नो पोस्टमा लेख्नुभएको छ।
​सम्मेलनमा कृषि क्षेत्रका नवीन उपायहरू, दिगो जीविकोपार्जन, जलवायु-अनुकूल खेती प्रणाली, डिजिटल कृषि, ग्रामीण उद्यमशीलता र प्रविधिमा आधारित कृषि रूपान्तरणका विविध आयामहरू प्रदर्शन गरिएका थिए। यस्ता अर्थपूर्ण सर-सङ्गत र अनुभव आदान-प्रदानले एउटा यस्तो बलियो साझा मञ्च तयार पार्नेछ, जहाँ व्यवहारिक विचारहरू फस्टाएर वास्तविक अवसरमा परिणत हुन सक्ने विश्वास उहाँले व्यक्त गर्नुभयो।

हाम्रो कृषक समुदायको समृद्ध भविष्यका लागि यस्ता सम्मेलनहरूले आपसी साझेदारी बढाउन र नयाँ पहलहरूलाई प्रेरित गर्न ठुलो मद्दत पुर्‍याउने भन्दै सांसद विष्टले उत्तर बङ्गलाको कृषि परिदृश्यमा वास्तविक परिवर्तनको बिजारोपण गरेकोमा आयोजक संस्था ‘एसोसिएसन फर कन्जर्भेसन एण्ड टुरिजम’ (एसीटी) लाई हार्दिक धन्यवाद समेत प्रकट गर्नुभएको छ।