उत्तर सिक्किममा कला अनि संस्कृतिको विकासमा नयाँ मोड

​मङ्गन: उत्तर सिक्किमको मङ्गनमा आज सांस्कृतिक अनि कलात्मक विकासलाई अझ बलियो बनाउने उद्देश्यका साथ ‘मङ्गन ड्रिम डान्स एकेडेमी’ को भव्य उद्घाटन गरियो। सिक्किम कला, संस्कृति अनि धरोहर विकास बोर्डका अध्यक्ष श्री सञ्जय दिलपाली राईको बाहुलीबाट यस नयाँ एकेडेमीको विधिवत् उद्घाटन भएको हो।
​यस गरिमामय अवसरमा मङ्गन नगर पञ्चायतकी अध्यक्ष सुश्री छिरिङ डोमा भुटिया, उत्तर जिल्ला क्रिकेट सङ्घका अध्यक्ष श्री रिन्जिङ नामग्याल भुटिया, अल सिक्किम डान्स इन्स्टिच्युट्स एसोसिएसनकी अध्यक्ष सुश्री सुष्मा छेत्री, डेभोट आर्टका सदस्यहरू, मङ्गनका ‘नारी अफ टुडे’ का प्रतिनिधिहरूका साथै विद्यार्थी, अभिभावक अनि स्थानीय गन्यमान्य व्यक्तिहरूको बाक्लो उपस्थिति रहेको थियो।
​कार्यक्रमका मुख्य अतिथि अध्यक्ष श्री सञ्जय दिलपाली राईले आफ्नो सम्बोधनमा मङ्गन ड्रिम डान्स एकेडेमीका सदस्यहरूलाई यो ठुलो उपलब्धिको निम्ति हार्दिक बधाई दिए। उनले समाजमा, विशेष गरी नानीहरूको समग्र विकासमा नृत्य र सांस्कृतिक गतिविधिहरूको कस्तो ठुलो महत्त्व रहन्छ भन्ने कुरामाथि प्रकाश पारे। यस्ता गतिविधिहरूले युवा पुस्तामा रचनात्मकता, आत्मविश्वास, अनुशासन र सांस्कृतिक चेतना बढाउन ठुलो मद्दत पुऱ्याउने उनले बताए। नव-उद्घाटित एकेडेमीले आगामी दिनहरूमा उदयमान कलाकारहरूका निम्ति एउटा बलियो मञ्च प्रदान गर्ने र मङ्गनको सांस्कृतिक उत्थानमा ठुलो योगदान दिने विश्वास उनले व्यक्त गरे।
​अध्यक्ष श्री राईले सिक्किममा कला अनि संस्कृतिलाई बढावा दिन राज्य सरकारले चालेका विभिन्न कदमहरूबारे पनि चर्चा गरे। सरकारले राज्यभरिका कलाकार र सांस्कृतिक टोलीहरूलाई आफ्नो प्रतिभा प्रदर्शन गर्न, सिक्किमको समृद्ध सांस्कृतिक धरोहरलाई जोगाउन र आफ्ना कलात्मक प्रयासहरूलाई अघि बढाउन मञ्च, पहिचान र आर्थिक सहयोग प्रदान गर्दै आएको उनले बताए। उनले थपे कि सरकारको उद्देश्य केवल सहयोग र पहिचान दिने मात्र नभएर नयाँ र स्थापित कलाकारहरूको सीप, क्षमता र व्यावसायिकतालाई सुधारेर उनीहरूलाई अझ अघि बढाउने पनि रहेको छ।

​मङ्गन नगर पञ्चायतकी अध्यक्ष सुश्री छिरिङ डोमा भुटियाले एकेडेमीको तर्फबाट राज्य सरकार, बोर्डका अध्यक्ष र अल सिक्किम डान्स इन्स्टिच्युट्स एसोसिएसनप्रति उनीहरूको अटुट सहयोग र प्रोत्साहनको निम्ति हार्दिक आभार प्रकट गरिन्। एकेडेमी यस क्षेत्रमा कलात्मक प्रतिभालाई निखार्न र सांस्कृतिक उत्कृष्टतालाई प्रवर्द्धन गर्न पूर्ण रूपमा प्रतिबद्ध रहने कुरामा उनले जोड दिइन्।
​यस उद्घाटन कार्यक्रमको अवसरमा मङ्गन ड्रिम डान्स एकेडेमीद्वारा एक सम्मान समारोह पनि आयोजना गरिएको थियो, जसमा कला, संस्कृति र सामुदायिक विकासको क्षेत्रमा पुऱ्याएको योगदानको कदर गर्दै विभिन्न व्यक्ति र संस्थाहरूलाई भव्य रूपमा अभिनन्दन गरियो।