नव मिलन परिवार, पुल बजार धोतरिया बालासनको तत्त्वावधानमा आयोजित बालासन कप ओपन नक्आउट फूटबल टुर्नामेण्टमा आइतवार दोस्रो सेमिफाइनल म्याच खेलियो। इनटेक नजिक खेल मैदानमा जारी यस सेभेन ए साइड टुर्नामेण्टअन्तर्गत भएको म्याचमा जीटी बोइज लेबोंगले यूएफसी बुङकुलुंगलाई टाईब्रेकरमा ५-४-ले पराजित गऱ्यो। नियमित समयको खेलमा स्कोर २-२-को बराबरीमा रहेको थियो। नियमित समयमा जीटी बोइजबाट सुजन तामाङ र वांगछेन तामाङले गोल गरे। यसरी नै यूएफसी बुङकुलुंगबाट योगेल सुब्बा र पुजन राईले गोल गरे। अब २२ जनवरीमा हुने फाइनलमा जीटी बोइज लेबोंग र नेपालको भीनस एफसी-बीच भिड़न्त हुनेछ। आयोजक समितिका अध्यक्ष हिम्मत प्रधानले बताएअनुसार, टुर्नामेण्टमा विजेता हुने टीमलाई ट्रफीको साथमा १ लाख ३० हजार रुपियाँको नगद पुरस्कार प्रदान गरिनेछ। यसरी नै उपविजेता हुने टीमलाई ट्रफीको साथमा ८० हजार रुपियाँको नगद पुरस्कार प्रदान गरिनेछ।