लिस्बन: स्टार फूटबललर क्रिस्टियानो रोनाल्डो लगातार छैटौंपल्ट फिफा वर्ल्ड कपखेल्ने तयारीमा रहेका छन्। ४१ वर्षीय अनुभवी फरवर्डलाई पोर्तुगलको २७ सदस्यीय टीममा स्थान प्राप्त भएको छ। रोनाल्डो अन्तर्राष्ट्रिय फूटबलमा सर्वाधिक म्याच (२२६) खेल्ने तथा सर्वाधिक १४३ गोल गर्ने पुरुष खेलाड़ी हुन्। उनले हालसम्म पाँचवटा वर्ल्ड कप खेलिसकेका छन् र लगातार छैटौं वर्ल्ड कप खेल्ने दुर्लभ उपलब्धि हासिल गर्ने तयारीमा छन्। यस सूचीमा रोनाल्डोका पूर्व ला लीगा प्रतिस्पर्धी लियोनल मेस्सी पनि रहेका छन्। मेस्सीले चार वर्षअघि अर्जेण्टिनालाई वर्ल्ड कप खिताब दिलाएपछि अब आफ्नो छैटौं वर्ल्ड कप खेल्ने तयारी गरिरहेका छन्। पाँचपल्टका बालोन डी’ओर विजेता रोनाल्डो जनवरी २०२३-देखि अल–नासरबाट खेलिरहेका छन्। गत नोभेम्बरमा रिपब्लिक अफ आयरल्याण्डविरुद्ध वर्ल्ड कप क्वालीफायर म्याचमा रातो कार्ड पाए पनि तीन म्याचको प्रतिबन्धबाट जोगिएका हुनाले उनी ग्रुप चरणका सबै म्याच खेल्न योग्य रहेका छन्। पोर्तुगलका प्रशिक्षक रोबर्टो मार्टिनेजले “२७ खेलाड़ी प्लस एक” भन्दै टीम घोषणा गरेका छन्। यो विशेष उल्लेख गत जुलाईमा कार दुर्घटनामा ज्यान गुमाउने लिभरपूलका खेलाड़ी डियोगो जोटाको लागि गरिएको हो। मार्टिनेजले भने, उनी (जोटा) हाम्रो शक्ति र खुशी थिए। डियोगोलाई गुमाउनु अत्यन्तै पीड़ादायी क्षण थियो। अब उनको सपना र राष्ट्रिय टीमका लागि उनले दिएको उदाहरणलाई अघि बढ़ाउनु हाम्रो जिम्मेवारी हो।
पोर्तुगल टीममा ब्रुनो फर्नाण्डेज पनि रहेका छन्, जसले यस सीजनमा म्यानचेष्टर युनाइटेडबाट उत्कृष्ट प्रदर्शन गरिरहेका छन्। यसरी पेरिस सेण्ट–जर्मेनका चारजना खेलाड़ी भिटिन्हा, जोआओ नेभेस, नुनो मेण्डेस र गोन्कालो रामोसले ३० मईमा आर्सनलविरुद्ध हुने च्याम्पियन्स लीग फाइनल पनि खेल्नेछन्। वर्ल्ड कपअघि पोर्तुगलले चिली र नाइजेरियाविरुद्ध मैत्रीपूर्ण म्याच खेल्नेछ। त्यसपछि टीमले १७ जूनमा डीआर कंगोविरुद्ध वर्ल्ड कप अभियान शुरु गर्नेछ। त्यसपछि पोर्तुगलले उज्बेकिस्तान र कोलम्बियाको सामना गर्नेछ।
फिफा वर्ल्ड कपको निम्ति पोर्तुगतको अन्तिम टीम यसप्रकार छः
गोलकीपर: डिएगो कोस्टा, जोस सा, रुइ सिल्वा, रिकार्डो भेल्हो।
डिफेण्डर: डिएगो डालोट, माथेउस नुनेन, नेल्सन सेमेडो, जोआओ कान्सेलो, नुनो मेण्डेज, गोन्सालो इनासियो, रेनाटो भेइगा, रुबेन डियाज, टोमास अराउजो।
मीडफिल्डर: रुबेन नेभेज, सामुएल कोस्टा, जोआओ नेभेस, भिटिन्हा, ब्रुनो फर्नाण्डेज, बर्नानर्डो सिल्वा।
फरवर्ड: जोआओ फेलिक्स, फ्रान्सिस्को ट्रिनकाओ, फ्रान्सिस्को कोनसेइकाओ, पेड्रो नेटो, राफाएल लिआओ, गोन्सालो गुएडेस, गोन्सालो रामोस, क्रिस्टियानो रोनाल्डो।