बामेन्डा: पोप लियो-१४ वाँ ले विश्वका शक्तिशाली मुलुकका नेताहरूले युद्धका लागि अर्बौं रकम खर्च गर्ने प्रवृत्तिको तीव्र आलोचना गरे। उनले विश्वमा ‘केही तानाशाहहरूबाट विनाश र लुटपाट भइरहेको’ बताए र ‘युद्धलाई धार्मिक भाषामा न्यायोचित ठहर गर्ने’ नेताहरूको पनि निन्दा गरे।
क्यामरुनको अंग्रेजी भाषी क्षेत्रको प्रमुख शहर बामेन्डा मा बिहीबार आयोजित शान्ति भेलामा सम्बोधन गर्दै उनले असामान्य रूपमा कडा अभिव्यक्ति दिए। उनका अनुसार, “युद्धका पक्षधरहरूले बिर्सन्छन् कि विनाश एक क्षणमै हुन सक्छ, तर पुनर्निर्माणका लागि जीवनभर पनि पर्याप्त हुँदैन। उनीहरूले अर्बौं रकम हत्या र विनाशमा खर्च गर्छन्, तर शिक्षा, स्वास्थ्य र पुनर्स्थापनाका लागि स्रोत अभाव हुन्छ।” उनले विश्वलाई ‘केही तानाशाहहरूले लुटिरहेको’ पनि बताए।
यो अभिव्यक्ति डोनाल्ड ट्रम्पले सामाजिक सञ्जालमार्फत पोपमाथि बारम्बार आलोचना गरेपछि आएको हो। ट्रम्पले पोपलाई “कमजोर” र “कट्टर वामपन्थी प्रभावमा परेको” आरोप लगाए। पोपको अफ्रिका भ्रमणका क्रममा दुवैबीचको तनाव बढ्दै गएको देखियो।
क्यामरुन को उत्तर–पश्चिम र दक्षिण–पश्चिम क्षेत्रमा झण्डै एक दशकदेखि जारी ‘अंग्लोफोन संकट’ मा हजारौं मानिसको ज्यान गयो। सन् २०१७ देखि सुरु भएको यस द्वन्द्वमा अलगाववादी समूहहरूले फ्रान्सेली भाषी बहुमतबाट अलग हुने माग गर्दै आए। यस संघर्षमा हालसम्म ६,५०० भन्दा बढीको मृत्यु भइसकेको छ भने ७ लाखभन्दा बढी मानिस आन्तरिक रूपमा विस्थापित भए।
पोप लियोको बामेन्डा भ्रमणलाई यस द्वन्द्वको सन्दर्भमा महत्वपूर्ण मानियो। अलगाववादी समूहहरूले उनको भ्रमणका क्रममा तीन दिनको युद्धविराम घोषणा गरे। उनले स्थानीय द्वन्द्व समाधानका लागि शान्ति, संवाद र न्यायको मार्ग अपनाउन आह्वान गरे।