नयाँ दिल्ली: भारतका शीर्ष युगल खेलाड़ी रोहन बोपन्नाले पेरिस ओलम्पिक खेलहरूमा एम श्रीराम बालाजी या युकी भाम्बरीसँग जोड़ी बनाउन सक्छन्। उनलाई अखिल भारतीय टेनिस संघ (एआईटीए)-बाट त्यसको मञ्जुरी प्राप्त हुने तय छ। विश्व युगल ऱ्याङकिंगमा चौथो स्थानमा रहने ४४ वर्षीय बोपन्नाले शीर्ष १०-मा सामेल भएको हुनाले आफ्नो जोड़ीदार चयन गर्न सक्नेछन्। पेरिस ओलम्पिकमा पुरुष युगल ड्र-मा ३२ वटा टीम हुनेछन्, जसमा एउटा देशले अधिकतम दुईवटा टीम राख्न सक्नेछ। क्वालीफिकेशनको मानदण्डहरू अनुसार शीर्ष १०-मा सामेल खेलाड़ीले आफ्नो जोड़ीदार चयन गर्न सक्छन्, जो एटीपी या डब्ल्यूटीए ऱ्याङकिंगमा शीर्ष ३०० भित्र रहेको हुनु पर्नेछ। यसबीच सूत्रबाट थाहालागे अनुसार, बोपन्नाले पेरिस ओलम्पिकको निम्ति आफ्नो जोड़ीदारको रूपमा टारगेट ओलम्पिक पोडियम योजना (टप्स)-मा सामेल गर्न एआईटीए-लाई बालाजी र भाम्बरीको नाम पठाएका छन्।
एआईटीए महासचिव अनिल धूपरले भने, साधारणत खेलाड़ीहरूले आफ्नो जोड़ीदार स्वयं चयन गर्छन्। चयन समितिले उनीसँग विकल्प सोध्नेछ अनि त्यसमाथि चर्चा गरिनेछ। उल्लेखनीय छ, बालाजीले हालै जर्मनीका आन्द्रे बेजेम्यानसँग काग्लियारी च्यालेञ्जर टुर्नामेण्ट जितेका थिए। यसरी भाम्बरीले फ्रान्सका अलबानो ओलिवेत्तीसँग अप्रेलमा म्यूनिखमा एटीपी २५० टुर्नामेण्ट जितेका थिए अनि यसै महिना बोर्डो च्यालेञ्जरको सेमिफाइनलमा स्थान बनाएका थिए।
भारतीय टेनिसमा ओलम्पिक या बहु खेल आयोजनहरूमा नामांकनलाई लिएर सदा विवाद रहेको छ। साल २०१२-मा महेश भूपति र बोपन्ना दुवैले लिएण्डर पेससँग खेल्न अस्वीकार गरेका थिए। त्यसपछि पेसले विष्णुवर्धनसँग जोड़ी बनाएका थिए। त्यसपछि मिश्रित युगलमा सानिया मिर्जालाई पेससँग खेल्नु भनिएको थियो तर देशकी शीर्ष महिला खेलाड़ी सानियाले पेसको मन राख्न उनलाई प्रयोग गरिएकोमा एआईटीए-को आलोचना गरेकी थिइन्। एशियन गेम्स २०१८-मा पनि पेसले उनलाई एआईटीए-ले विशेषज्ञ जोड़ीदार नदिएको आरोप लगाएर दुई दिन अघि नाम फिर्ता लिएका थिए। एआईटीए-ले बोपन्ना र दिविज शरणको जोड़ी बनाएको थियो। यसैकारण पेसले एकल खेलाड़ीसँग खेल्नु पर्ने थियो। बोपन्नाको निम्ति यो ओलम्पिक पदक जित्ने अन्तिम मौका हुनेछ, जो २०१६-मा रियो ओलम्पिकको मिश्रित युगलमा सानियासँग पदक जित्नदेखि चुकेका थिए।