‎कालिम्पोङ: दार्जिलिङ जिल्लाअन्तर्गत ३६ नम्बर निर्वाचन क्षेत्रका स्वतन्त्र जीटीए सभासद् पाल्देन तामाङ र उहाँको नेतृत्वमा रहेको गोर्खा स्वतन्त्र समूहले भारतका प्रधानमन्त्री नरेन्द्र मोदीको नेतृत्वप्रति विश्वास व्यक्त गर्दै भारतीय जनता पार्टी(भाजपा) मा औपचारिक रूपमा प्रवेश गरेका छन्।
भारतीय जनता पार्टी दार्जिलिङ जिल्ला अध्यक्ष सञ्जीव लामा र अन्य जिल्ला स्तरीय नेताहरूको उपस्थितिमा राजु बिष्टले उहाँहरूलाई पार्टीमा स्वागत गरेका थिए।
‎हालै सम्पन्न निर्वाचन अभियानका क्रममा कालिम्पोङ क्षेत्रमा भारतीय जनता पार्टीका उम्मेदवार भरत क्षेत्रीको विजयका लागि पाल्देन तामाङ र उहाँको समूहले सक्रिय रूपमा सहयोग गरेको योगदानलाई विशेष रूपमा सराहना गरिएको छ।
उनीहरूको समर्पण, प्रतिबद्धता र साझा दृष्टिकोणप्रतिको विश्वासले क्षेत्रको विकास, प्रगति तथा जनताको आकाङ्क्षा पूरा गर्ने लक्ष्यलाई अझ सुदृढ बनाएको उल्लेख गरिएको छ।
सांसद राजु बिष्टले नयाँ सहकार्यले कालिम्पोङ तथा गोर्खा समुदायका जनताको उज्ज्वल भविष्य निर्माणमा महत्वपूर्ण भूमिका खेल्ने विश्वास व्यक्त गर्दै उहाँहरूलाई सफल यात्राका लागि शुभकामना व्यक्त गरेका छन्।