​पाक्योङ: पाक्योङ जिल्ला प्रशासनिक केन्द्रको सभाहलमा आज जिल्लाका विभिन्न उप-विभागका राजस्व अधिकारी, राजस्व निरीक्षक, मुख्य सर्भेयर तथा राजस्व सर्भेयरहरूका लागि ‘एग्रीस्ट्याक’ सम्बन्धी एकदिने तालिम सम्पन्न भएको छ। अतिरिक्त जिल्लापाल (मुख्यालय) सबिन्द्र राईको अध्यक्षतामा सो तालिम आयोजना गरिएको हो।
​तालिमको मुख्य उद्देश्य अधिकारीहरूलाई ‘एग्रीस्ट्याक फार्मर रजिष्ट्री’ मोबाइल एप र डिजिटल माध्यमबाट प्रमाणित किसानको विवरणलाई जग्गा अभिलेखसँग जोड्ने प्रक्रियाबारे जानकारी गराउनु रहेको थियो।
​सो अवसरमा सूचना प्रविधि (आइटी) विभागका सह-निर्देशक बिक्रम राईले एग्रीस्ट्याक एउटा एकीकृत डिजिटल प्लेटफर्म भएको बताउँदै यसले किसान, जग्गा र बालीको प्रमाणीकृत विवरणलाई जोडेर सरकारी सेवा, कृषि परामर्श, अनुदान तथा अन्य सुविधाहरू पारदर्शी एवं प्रभावकारी रूपमा उपलब्ध गराउन मद्दत पुर्‍याउने बताए।
​उनले ‘सिक्किम्स एग्रीस्ट्याक जर्नी: एडभासिङ डिजिटल एग्रिकल्चर’ विषयमा प्रस्तुतीकरण दिँदै सिक्किमको ‘डिजिटल कृषि मिसन’ अन्तर्गत किसान रजिष्ट्री, जियो-रेफरेन्स्ड गाउँका नक्सा र डिजिटल बाली सर्वेक्षण गरी तीन मुख्य आधारमा काम भइरहेको जानकारी दिए। साथै, पाक्योङ जिल्लामा हालसम्म ११ हजार ३ सय ६० जना किसानहरू फार्मर रजिष्ट्रीमा दर्ता भइसकेको उनले जानकारी गराए।
​तालिममा आइटी विभागका सहायक निर्देशक हर्का लामिछानेले मोबाइल एपको प्रयोग र स्वीकृति प्रक्रियाबारे व्यवहारिक (ह्यान्ड्स-अन) अभ्यास गराएका थिए। कार्यक्रममा कृषि विभागकी उप-निर्देशक रेबेका गुरुङ, कृषि विकास अधिकारी गगन गुरुङ र आइटी विभागका सहायक निर्देशक निर्णय राईको पनि उपस्थिति थियो।