गान्तोक: सिक्किम खो-खो सङ्घद्वारा आयोजित पहिलो राज्यस्तरीय खो-खो च्याम्पियनशिप आज रेशिथाङको खेल गाउँमा सुरु भएको छ। कार्यक्रममा राज्यपाल ओम प्रकाश माथुर प्रमुख अतिथिका रूपमा उपस्थित भइ प्रतियोगिताको उद्घाटन गरे।
प्रतियोगितामा सब-जुनियर (महिला र पुरुष) तथा खुल्ला श्रेणी (महिला र पुरुष) मा प्रतिस्पर्धा गरिनेछ। राज्यपालले उद्घाटन समारोहलाई सम्बोधित गर्दै भने, “खो-खो भारतको पारम्परिक खेल हो, जुन हाम्रो सांस्कृतिक विरासतसँग गहिरो नाता राख्दछ।”
उनले प्रतियोगितामा साना खेलाडीहरूको सक्रिय सहभागिता देखेर खुशी व्यक्त गर्दै भने, “यस खेलले युवाहरूमा सामूहिक भावना, अनुशासन र शारीरिक स्फूर्तिलाई प्रोत्साहित गर्ने कार्य गर्दछ, र यसलाई प्राथमिकता दिनु आवश्यक छ।”
राज्यपालले राज्यका विभिन्न जिल्लाबाट २४ टोलीहरू प्रतियोगितामा सहभागी भएकोमा सन्तुष्टि व्यक्त गर्दै आयोजक, खेलाडी र प्रशिक्षकलाई शुभकामना दिए।

उनले सिक्किमका प्रतिभाशाली खेलाडीहरू यस मञ्चबाट अघि बढेर राष्ट्रिय र अन्तर्राष्ट्रिय स्तरमा आफ्नो पहिचान बनाउने विश्वास व्यक्त गरे।
आजदेखि शुरु भएको यो प्रतियोगिता ५ अप्रिलसम्म जारी रहनेछ। यस अवसरमा स्वास्थ्य एवं परिवार कल्याण विभागका मन्त्री जीटी ढुङ्गेल, क्षेत्र विधायक कला राई, गान्तोक विधायक दिले नामग्याल लगायत अन्य विशिष्ट व्यक्तिहरूको उपस्थिति रहेको थियो।