दुबई: इरानले शुक्रबार कुवेतको मिना अल-अहमदी तेल प्रशोधन केन्द्रमा ड्रोन आक्रमण गरेको छ, जसका कारण त्यहाँ भीषण आगलागी भएको छ। राज्यस्वामित्वको कम्पनी कुवेत पेट्रोलियम कर्पोरेशनले आक्रमणको पुष्टि गर्दै दमकलकर्मीहरू आगो नियन्त्रणमा लिन प्रयासरत रहेको जनाएको छ। कम्पनीका अनुसार यस घटनामा कसैको घाइते भएको खबर छैन।
कुवेतमा जम्मा तीनवटा तेल प्रशोधन केन्द्र छन्, जसमा मिना अल-अहमदी प्रशोधन केन्द्र अत्यन्त महत्वपूर्ण मानिन्छ। युद्धको समयमा यस केन्द्रमाथि पटक–पटक आक्रमण हुँदै आएको छ। यी प्रशोधन केन्द्रहरू देशको तेल उत्पादनको मेरुदण्ड हुन्, किनकि यिनै बिना तेल कुवाबाट निकालिएको कच्चा तेल प्रशोधन र निर्यात गर्न सम्भव हुँदैन। प्रशोधन केन्द्र बन्द भएमा उत्पादन ठप्प हुन सक्छ र पुनः सञ्चालनमा ल्याउन लामो समय लाग्छ।
नुनिलो पानी शुद्धिकरण केन्द्र पनि निशानामा:
कुवेतले आक्रमणका क्रममा एक नुनिलो पानी शुद्धिकरण केन्द्रका केही भागमा क्षति पुगेको जनाएको छ, यद्यपि विस्तृत विवरण दिइएको छैन। खाडी क्षेत्रका देशहरूका लागि यस्ता केन्द्र अत्यन्त आवश्यक हुन्छन्, किनकि यिनैबाट समुद्री नुनिलो पानीलाई पिउन योग्य बनाइन्छ।
कुवेतमा पिउने पानीको करिब ९० प्रतिशत यिनै प्रक्रियाबाट प्राप्त हुन्छ। जारी द्वन्द्वका क्रममा यी शुद्धिकरण केन्द्रहरू मुख्य निशानामा पर्न थालेका छन्। यसअघि इरानले एउटा केन्द्रमा भएको आक्रमणका लागि अमेरिका र इजरायललाई दोष दिएको थियो, त्यसपछि खाडी क्षेत्रका देशहरूका केन्द्रहरू लक्षित हुन थालेका छन्।
हर्मुज जलडमरूमध्यबारे इरानको नयाँ कदम:
यसैबीच इरानले ओमानसँग मिलेर हर्मुज जलडमरूमध्यको निगरानीका लागि प्रस्ताव तयार गरिरहेको दाबी गरेको छ। सरकारी समाचार संस्थाका अनुसार यस प्रस्तावको उद्देश्य समुद्री मार्गमा जहाजहरूको आवागमनलाई सुरक्षित र सहज बनाउनु हो।
तर क्षेत्रका जहाजहरूमा भइरहेका आक्रमण तथा यस मार्ग प्रयोग गर्न ठूलो रकम मागिएको आरोपका कारण अवस्था तनावपूर्ण बनेको छ। प्रस्तावको स्वरूप र प्रभावबारे हालसम्म स्पष्ट जानकारी आएको छैन। उता ओमानले पनि यस विषयमा तत्काल कुनै प्रतिक्रिया दिएको छैन।
यो जलडमरूमध्य इरान र ओमानबीच रहेको एक अन्तर्राष्ट्रिय समुद्री मार्ग हो, जहाँ जहाजहरूको स्वतन्त्र आवागमन अपेक्षित हुन्छ।
इरानी कूटनीतिज्ञ काजिम घारिबाबादीले वर्तमान युद्ध परिस्थितिमा समुद्री यातायातमा गम्भीर प्रभाव परेको र शान्तिकालीन नियम लागू हुन नसक्ने बताएका छन्।