मुख्यमन्त्रीप्रति आभार व्यक्त

​सिलगढी: पश्चिम बङ्गाल सरकारले राज्यका लाखौँ आंगनवाडी कार्यकर्ता, सहायिका र आशा कर्मीहरूको मासिक पारिश्रमिकमा उल्लेखनीय वृद्धि गर्ने घोषणा गरेको छ।
आगामी १ अगस्ट २०२६ देखि लागू हुने यस ऐतिहासिक निर्णयको राज्यभरिका अग्रपङ्क्तिमा खटिने स्वास्थ्य तथा सामाजिक कार्यकर्ताहरूले भव्य स्वागत गरेका छन्।
​वर्तमान समयमा राज्यभरि दुई लाखभन्दा बढी आंगनवाडी कार्यकर्ता कार्यरत छन्, जसले हालसम्म मासिक ९,००० रुपैयाँ मात्र पारिश्रमिक पाउँदै आएका थिए भने अब उनीहरूको पारिश्रमिक बढेर मासिक १४,००० रुपैयाँ पुग्ने भएको छ। त्यसै गरी, हालसम्म मासिक ६,५०० रुपैयाँ पारिश्रमिक पाउँदै आएका आंगनवाडी सहायिकाहरूको पारिश्रमिक अब ११,८०० रुपैयाँ हुनेछ। राज्यका करिब ६५ हजार आशा कर्मीहरूले पनि अब बढेको नयाँ पारिश्रमिक अनुसार मासिक ११,२५० रुपैयाँ प्राप्त गर्नेछन्। लामो समयको पर्खाइपछि सरकारले उनीहरूको सेवाको उचित मूल्याङ्कन गर्दै पारिश्रमिकमा यो ठुलो वृद्धि गरेको हो।
​यस सुखद निर्णयप्रति खुसी व्यक्त गर्दै सम्पूर्ण आईसीडीएस, आंगनवाडी र आशा कर्मीहरूका तर्फबाट माननीय मुख्यमन्त्री श्री शुभेन्दु अधिकारी तथा पश्चिम बङ्गाल सरकारप्रति हार्दिक आभार प्रकट गरिएको छ। विज्ञप्तिमा जनाइएअनुसार अत्यन्तै दुर्गम र चुनौतीपूर्ण परिस्थितिमा पनि आमा, बालबालिका र विपन्न परिवारको सेवामा अहोरात्र खटिने यी श्रमजीवीहरूको अथक सेवाको यो साँचो कदर हो। आज उनीहरूको सेवा र पारिश्रमिकलाई सरकारले न्यायोचित मूल्य दिएको छ, जसले अग्रपङ्क्तिका यी कर्मीहरूको मनोबल उच्च बनाउनेछ र समुदायप्रतिको समर्पणलाई अझ मजबुत पार्नेछ।
मुख्यमन्त्री अधिकारीको समावेशी विकासको नीतिले श्रमको सम्मान गरेको भन्दै सबै सरोकारवालाहरूले सरकारको सराहना गरेका छन्।