​काठमाडौँ: नेपालमा चीनको सहयोगमा चलिरहेका विभिन्न परियोजनाहरूले अब छिट्टै नै गति पाउने अपेक्षा गरिएको छ। चार दिने भ्रमणको सिलसिलामा आइतबार चीन पुग्नुभएका नेपालका परराष्ट्रमन्त्री शिशिर खनालले सोमबार आफ्ना चिनियाँ समकक्षी वाङ्ग यीसँग द्विपक्षीय वार्ता गर्नुभएको छ।
​यस भेटवार्ताको क्रममा, चीनले पहिले नै सम्झौता भइसकेका परियोजनाहरूलाई तीव्रता दिने आश्वासन दिएको कुरा नेपाल परराष्ट्र मन्त्रालयद्वारा जारी विज्ञप्तिमा जनाइएको छ।
​दुई देशका प्रतिनिधिमण्डलहरूबीच पूर्वाधार विकास, सम्पर्क र कनेक्टिभिटी, सीमा व्यवस्थापन, ऊर्जा, व्यापार, लगानी, कृषि, प्रविधि हस्तान्तरण, सूचना प्रविधि अनि डिजिटाइजेसन, पर्यटन, रासायनिक मल, पेट्रोलियम र प्राकृतिक ग्यास अन्वेषणका साथै जनस्तरको सम्बन्धलाई अझ सुदृढ़ पार्ने जस्ता कतिपय महत्त्वपूर्ण विषयहरूमा विस्तृत छलफल भयो। यसका साथै, सुशासन र आर्थिक विकासका प्राथमिकताहरूमा नेपाल सरकारलाई पूर्ण सहयोग गर्ने आफ्नो प्रतिबद्धतालाई चीनले फेरि एकपल्ट दोहोऱ्याएको छ।
​वार्ताको क्रममा नेपालले आफ्नो भूमिलाई चीन विरोधी गतिविधिहरूमा कुनै पनि हालतमा प्रयोग हुन नदिने कुरा स्पष्ट पारेको छ। जवाफमा, चीनले पनि नेपालको सार्वभौमिकता, क्षेत्रीय अखण्डता र स्वतन्त्रताप्रति आफ्नो दृढ़ समर्थन र सम्मान व्यक्त गरेको छ। साथै, नेपालको सुशासन र आर्थिक विकासको एजेन्डालाई हरसम्भव सहयोग गर्ने आश्वासन पनि चीनले दिएको छ।
​यस सफल द्विपक्षीय वार्तापछि चिनियाँ परराष्ट्रमन्त्री वाङ्ग यीले मन्त्री खनालको सम्मानमा एक रात्रिभोजको समेत आयोजना गर्नुभएको थियो।