​नयाँ दिल्ली: मेडिकल प्रवेश परीक्षा (नीट-यूजी) मा देखिएको प्रश्नपत्र लीकको गम्भीर विवादपछि केन्द्र सरकारले परीक्षा प्रणालीमा आमूल परिवर्तन गर्ने विशेष घोषणा गरेको छ। केन्द्रीय शिक्षा मन्त्री धर्मेन्द्र प्रधानले शुक्रबार नयाँ दिल्लीमा आयोजित पत्रकार सम्मेलनमा आगामी वर्षदेखि यो परीक्षा पूर्ण रूपमा ‘कम्प्युटर बेस्ड टेस्ट’ (सीबीटी) मोडमा मात्र सञ्चालन हुने जानकारी दिनुभयो। गत मे ३ मा भएको परीक्षामा प्रश्नपत्र बाहिरिएको पुष्टि भएपछि सरकारले उक्त परीक्षा रद्द गरी नयाँ कार्यतालिका समेत सार्वजनिक गरेको छ।
​शिक्षा मन्त्रीका अनुसार रद्द भएको परीक्षा आगामी २१ जुनमा पुनः सञ्चालन हुनेछ भने त्यसका लागि जुन १४ सम्ममा प्रवेश पत्र जारी गरिनेछ। सरकारले परीक्षार्थीहरूलाई ठूलो राहत दिँदै पुरानो परीक्षा शुल्क फिर्ता गर्ने र पुनः परीक्षा पूर्ण रूपमा निःशुल्क गराउने निर्णय गरेको छ। यसका साथै विद्यार्थीहरूले परीक्षाको एक हप्ता अगाडि आफूलाई पायक पर्ने परीक्षा केन्द्र वा सहर रोज्न पाउने सुविधा समेत पाउनेछन्। चर्को गर्मी र मौसमको प्रतिकूलतालाई मध्यनजर गर्दै विद्यार्थीका लागि यातायातको सहज प्रबन्ध मिलाउन समेत सरकारले प्रयास थालेको छ।
​प्रश्नपत्र लीक प्रकरणको गम्भीरतालाई हेर्दै यसको विस्तृत अनुसन्धानको जिम्मा केन्द्रीय अनुसन्धान ब्युरो (सीबीआई)लाई सुम्पिएको छ। मन्त्री प्रधानले परीक्षा प्रणालीमा देखिएका कमजोरीहरूलाई स्वीकार गर्दै अबका दिनमा ‘जिरो एरर’ नीति अपनाइने र कुनै पनि ‘परीक्षा माफिया’ लाई उन्मुक्ति नदिइने स्पष्ट पार्नुभयो। नेशनल टेस्टिङ एजेन्सी (एनटीए) मार्फत हुने आगामी परीक्षाहरूमा उच्च प्रविधिको प्रयोग गरी पारदर्शिता सुनिश्चित गरिने र मिहिनेती छात्रछात्राहरूको भविष्य सुरक्षित राखिने सरकारी प्रतिबद्धता छ।