दिगो ग्रामीण विकासमा जोड

​कोलकाता: राष्ट्रिय कृषि र ग्रामीण विकास बैंक (नाबार्ड) को पश्चिम बङ्गाल क्षेत्रीय कार्यालयले आफ्नो ४५औं स्थापना दिवस भव्य रूपमा मनाएको छ। स्थापना दिवसका अवसरमा नाबार्डले समावेशी, दिगो र प्रविधिमा आधारित ग्रामीण विकासप्रतिको आफ्नो प्रतिबद्धतालाई पुनः दोहोऱ्याएको छ। उक्त समारोहमा भारतीय रिज़र्व बैंक, राज्य सरकार, विभिन्न बैंक, सहकारी संस्था तथा विकास साझेदार सङ्गठनका वरिष्ठ अधिकारीहरूको उपस्थिति रहेको थियो।

​कार्यक्रममा भारतीय रिज़र्व बैंकका क्षेत्रीय निर्देशक सुधांशु प्रसाद मुख्य अतिथि तथा राज्य स्तरिय बैंकर्स समिति (एसएलबीसी) पश्चिम बङ्गालका संयोजक बलबीर सिंह विशिष्ट अतिथिका रूपमा उपस्थित थिए। नाबार्ड पश्चिम बङ्गाल क्षेत्रीय कार्यालयका मुख्य महाप्रबन्धक पी.के. भारद्वाजले आमन्त्रित अतिथिहरूलाई स्वागत गरेका थिए।
​कृषि र ग्रामीण विकासमा नाबार्डको योगदान
आफ्नो सम्बोधनका क्रममा मुख्य महाप्रबन्धक भारद्वाजले कृषि एवं ग्रामीण विकासको क्षेत्रमा नाबार्डले चार दशकभन्दा बढी समयदेखि पुऱ्याएको योगदानमाथि प्रकाश पारे। उनले पुनर्वित्त (रीफाइनेंस), ग्रामीण पूर्वाधार विकास, संस्थागत सुदृढीकरण तथा क्रेडिट प्लस पहलहरूमा नाबार्डको भूमिकालाई रेखदेख गरे। अन्तर्राष्ट्रिय महिला किसान वर्ष २०२६ को सन्दर्भ जोड्दै उनले महिला नेतृत्वका स्वयं सहायता समूह (एसएचजीहरू) हरूको परिवर्तनकारी भूमिकाको विशेष चर्चा गरे।
​उनका अनुसार नाबार्डले ग्रामीण पूर्वाधार विकास कोष (आरआईडीएफ), ४,६०० प्राथमिक कृषि ऋण समिति (प्याक्स) को कम्प्युटराइजेशन, किसान उत्पादक सङ्गठन (एफपीओहरू) को प्रवर्द्धन तथा क्षेत्रीय ग्रामीण बैंकहरूको सुदृढीकरणमा महत्त्वपूर्ण योगदान दिएको छ। यसैगरी, कृषि क्षेत्रमा कुल सकल ऋण प्रवाह (जीएलसी) उपलब्धि १.१७ लाख करोड रुपैयाँ रहेको जानकारी दिइयो। सम्भाव्यतामा आधारित ऋण योजना (पीएलपी) २०२६-२७ अनुसार पश्चिम बङ्गालको प्राथमिकता क्षेत्रको ऋण क्षमता ३.९९ लाख करोड रुपैयाँ अनुमान गरिएको छ, जसमध्ये १.३७ लाख करोड रुपैयाँ कृषि तथा सम्बद्ध क्षेत्रका लागि निर्धारण गरिएको छ।
​डिजिटलाइजेशन र जलवायुमैत्री कृषिमा जोड
विशिष्ट अतिथि बलबीर सिंहले भारतीय कृषिको सबलीकरणमा जोड दिँदै कृषि निर्यातका सम्भावनाहरू औंल्याए। मुख्य अतिथि सुधांशु प्रसादले नाबार्डलाई ४५ वर्षको सफल सेवाका लागि बधाई दिँदै देशको अग्रणी विकास वित्तीय संस्थाका रूपमा यसको प्रशंसा गरे। उनले ‘विकसित भारत २०४७’ को लक्ष्य प्राप्तिका लागि डिजिटल प्रविधि अपनाउन, मूल्य अभिवृद्धि गर्न र जलवायु-संवेदनशील कृषिलाई बढावा दिन आह्वान गरे।
​समारोहका क्रममा नाबार्डको वार्षिक उपलब्धि पुस्तिका २०२५-२६ र सफलताका कथाहरूको सङ्गालो विमोचन गरिएको थियो। साथै, वाटरशेड विकास र एफपीओहरू मा आधारित वृत्तचित्रहरू प्रदर्शन गरिएका थिए। नाबार्डका विभिन्न पहलहरूसँग जोडिएका महिला किसानहरूलाई सम्मानित गरिनुका साथै पश्चिम मेदिनीपुर, मालदा र नदिया जिल्लाका विकास प्रबन्धकहरूले आफ्ना जिल्लाका नवीन कार्यहरूको प्रस्तुतीकरण गरेका थिए। कार्यक्रम स्थलमा महिला उद्यमी र स्वयं सहायता समूहद्वारा उत्पादित सामग्रीहरूको छ वटा प्रदर्शनी स्टलहरू समेत राखिएका थिए।