बेलुर मठदेखि शोभाबजार राजबाडीसम्म पुग्ने कार्यक्रम

कोलकाता: भारतका केन्द्रीय गृहमन्त्री अमित शाह यसै साता दुर्गा पूजाकाे अवसरमा पश्चिम बंगालको भ्रमणमा आउने भएका छन्। भारतीय जनता पार्टी (भाजपा) को पश्चिम बंगाल राज्य इकाइका स्रोतका अनुसार शाहले कोलकाताका प्रमुख दुर्गा पूजा पण्डालहरूका साथै ऐतिहासिक तथा धार्मिक स्थलहरूको भ्रमण गर्ने कार्यक्रम रहेको छ।
भ्रमणका क्रममा उनले बेलुर मठ, बाली क्षेत्रस्थित देशबन्धु क्लब, चेतलाको २४ पल्ली दुर्गा पूजा, उत्तर कोलकाताको ऐतिहासिक शोभाबजार राजबाडी र श्रीभूमि पूजा पण्डालको अवलोकन गर्ने सम्भावना छ।
भाजपा स्रोतका अनुसार शाह अक्टोबर १७ मा राति करिब ८ बजेर १० मिनेटमा अहमदाबादबाट कोलकाता आइपुग्नेछन्। त्यसपछि उनी अलिपुरस्थित ‘सौजन्य’ अतिथिगृह जानेछन्, जहाँ रात बिताउने कार्यक्रम छ।
अक्टोबर १८ मा शाह रामकृष्ण मठ तथा मिशनको मुख्यालय बेलुर मठ पुग्नेछन्। त्यहाँ उनले करिब ३० मिनेट बिताउने र विशेष धार्मिक महत्त्वका साथ आयोजना गरिने दुर्गा पूजा समारोहमा सहभागी हुने कार्यक्रम छ।
बेलुर मठमा दुर्गा पूजा गहिरो आध्यात्मिक श्रद्धाका साथ मनाइन्छ। यहाँ मानव सेवामार्फत ईश्वरको आराधना गर्ने आध्यात्मिक दर्शनलाई विशेष महत्त्व दिइन्छ। मठमा दुर्गा पूजा मनाउने परम्परा स्वामी विवेकानन्दसँग जोडिएको छ।
बेलुर मठको भ्रमणपछि शाह बाली क्षेत्रस्थित देशबन्धु क्लब पुगेर दुर्गा पूजा पण्डालको अवलोकन गर्ने सम्भावना छ। त्यसपछि उनी पुनः ‘सौजन्य’ अतिथिगृह फर्कनेछन्।
उनको भ्रमण तालिकामा चेतलाको २४ पल्ली दुर्गा पूजा र उत्तर कोलकाताको ऐतिहासिक शोभाबजार राजबाडीमा आयोजना हुने परम्परागत दुर्गा पूजा समारोह पनि समावेश रहेको स्रोतहरूले बताएका छन्।
शोभाबजार राजबाडी कोलकाताका पुराना प्रतिष्ठित कुलीन परिवारमध्ये एकको ऐतिहासिक निवास हो। यहाँ लामो समयदेखि परम्परागत रूपमा दुर्गा पूजा मनाइँदै आएको छ। शाहले राजबाडीमा केही समय बिताउने, पूजाका धार्मिक विधि अवलोकन गर्ने तथा आरतीमा सहभागी हुने अपेक्षा गरिएको छ।
त्यसपछि उनी श्रीभूमि दुर्गा पूजा पण्डाल पुग्नेछन्। भ्रमण सम्पन्न गरेपछि शाह सोही दिन कोलकाता विमानस्थलबाट दिल्ली प्रस्थान गर्ने कार्यक्रम रहेको स्रोतहरूले जानकारी दिएका छन्।
पश्चिम बंगालमा सत्ता परिवर्तनपछि मनाउन लागिएको पहिलो दुर्गा पूजा उत्सवका क्रममा शाहको यो भ्रमण हुन लागेको हो। मुख्यमन्त्री शुभेन्दु अधिकारीले महालया पर्वका अवसरमा इडेन गार्डेन्समा भव्य कार्यक्रम आयोजना गर्दै यस वर्षको उत्सवको सुरुवात गरेका थिए।