२९ जुलाईः खरसाङको हिल्स फूटबल एकाडमीको तत्त्वावधानमा आयोजित भेटरन्स (फोर्टी प्लस) फूटबल टुर्नामेण्टमा शुक्रवार दुईवटा क्वार्टर फाइनल म्याच खेलियो। स्थानीय मण्टिभियट खेल मैदानमा खेलिएको पहिलो म्याचमा दार्जीलिङ भीजन भेटरन्सले सुकना भेटरन्सलाई ३-०-ले पराजित गऱ्यो। विजेता टीमका विनोद प्रधानलाई प्लेयर अव् द म्याच चयन गरियो। यसरी दोस्रो म्याचमा हिल्स फूटबल एकाडमी (एचएफए) अफिसियल्सले बतासे दार्जीलिङ भेटरन्सलाई पेनल्टी शूटआउटमा ५-४-ले पराजित गऱ्यो। नियमित समयको खेलमा स्कोर ३-३-को बराबरीमा रहेको थियो। विजेता टीमका अजय लामालाई प्लेयर अव् द म्याच चयन गरियो। यसरी शुक्रवारदेखि महिला फूटबल टुर्नामेण्ट पनि शुरु भयो। यसमा सुबोथ फूटबल एकाडमीले सौरेनीको रविन्द्रनाथ हाई स्कूललाई पेनल्टी शूटआउटमा ३-१-ले पराजित गरी फाइनलमा स्थान बनायो। नियमित समयमा स्कोर १-१-को बराबरीमा रहेको थियो। विजेता टीमका निशा गुरुङलाई प्लेयर अव् द म्याच चयन गरियो। यस सेभेन ए साइड भेटरन्स र महिला दुवै टुर्नामेण्टको फाइनल ६ अगस्तमा हुने हिल्स फूटबल एकाडमीका प्रमुख तथा राष्ट्रिय स्तरका फूटबलर नगेन तामाङले बताएका छन्।