मस्को: रूसले टी-१४ नेक्स्ट–जेनेरेसन मुख्य युद्ध ट्याङ्कको परीक्षण गरिरहेको छ। रुसी सामाजिक सञ्जाल प्लेटफर्ममा केही तस्बिरहरू सार्वजनिक भएका छन्। ड्यासक्याम फुटेजमा टी-१४ नेक्स्ट–जेनेरेसन मुख्य युद्ध ट्याङ्कको परीक्षण भइरहेको देखिन्छ। यो फुटेज यस्तो समयमा सार्वजनिक भएको हो, जब यस कार्यक्रमको भविष्य निकै अनिश्चित बनेको छ। उक्त ट्याङ्कलाई परीक्षणस्थलतर्फ जाँदै गर्दा कच्ची सडक पार गरिरहेको देख्न सकिन्छ। परीक्षणस्थलमा हुने सामान्य अभ्यासजस्तै देखिएको थियो। यस ट्याङ्कको भविष्यलाई लिएर प्रश्न उठ्नुको कारण युक्रेनी ट्याङ्कहरूले यसको सामना गरिसकेको दाबी गरिएको छ।
के रूसको यो ‘अजेय’ टी-१४ रोबोटिक ट्याङ्कले युद्धको दिशा बदल्न सक्छ?
टी-१४ सोभियत संघको नेक्स्ट–जेनेरेसन ट्याङ्क कार्यक्रमकै विकसित रूप हो। यस कार्यक्रमको उद्देश्य सन् १९९० को दशकको अन्त्यसम्ममा सोभियत संघको बख्तरबन्द युद्ध क्षमतामा ठूलो परिवर्तन ल्याउनु थियो। सोभियत संघको विघटनले यस कार्यक्रमलाई ठूलो धक्का पुर्‍यायो र अन्ततः सन् २००० को दशकमा यसलाई रद्द गरियो। त्यसपछि उस्तै डिजाइन अवधारणामा आधारित टी-१४ लाई यसको उत्तराधिकारीका रूपमा विकास गरियो।
युक्रेन युद्धमा रुसी ट्याङ्क प्रभावहीन साबित भए
सन् २०१५ मा टी-१४ पहिलोपटक सार्वजनिक गरिँदा, दशकको अन्त्यसम्म यसले रुसी सेनालाई सन् १९६० को दशकमा टी-६४ ले सोभियत सेनालाई दिएको जस्तै विश्वकै शक्तिशाली मुख्य युद्ध ट्याङ्क उपलब्ध गराउने अपेक्षा गरिएको थियो। तर यो ट्याङ्कलाई सेवामा ल्याउन नसक्दा चीन रूसभन्दा अगाडि बढेको र अक्टोबर २०२५ मा ‘टाइप १००’ ट्याङ्क सार्वजनिक गरेर नयाँ पुस्ताको ट्याङ्क सेवामा ल्याउने पहिलो देश बनेको उल्लेख गरिएको छ। निकै नयाँ डिजाइन भएका कारण ‘टाइप १००’ आधुनिक र भीषण युद्धका लागि अझ उपयुक्त देखिन्छ।