नयाँ दिल्ली: ​अमेरिकी राष्ट्रपति डोनाल्ड ट्रम्पले सामाजिक सञ्जालमा भारत, चीन र अन्य केही देशहरूलाई ‘नरक जस्ता ठाउँहरू’ भनी टिप्पणी गरेपछि विश्वभर यसको तीव्र आलोचना भइरहेको छ। ट्रम्पले जन्मसिद्ध नागरिकताको आलोचना गर्ने क्रममा आप्रवासीहरूको सन्दर्भमा यस्तो आपत्तिजनक शब्द प्रयोग गरेका थिए। विवाद बढेपछि उनले उक्त पोस्ट हटाए तापनि प्रसिद्ध अमेरिकी गायिका म्यारी मिलवेनले यसको कडा प्रतिवाद गर्नुभएको छ। मिलवेनले आफ्ना भारतीय–अमेरिकी र एसियाली–अमेरिकी दाजुभाइ तथा दिदीबहिनीहरू अमेरिकालाई महान् बनाउने एक महत्त्वपूर्ण हिस्सा भएको बताउँदै उनीहरूको समर्थनमा उभिनुभएको छ।
​मिलवेनले आफूले भारत र चीन दुवै देशमा सांगीतिक प्रस्तुति दिएको र त्यहाँको संस्कृतिप्रति आफ्नो गहिरो लगाव रहेको उल्लेख गर्दै ती देशहरू कुनै ‘नरक’ नभई विश्वलाई पालनपोषण गर्ने महत्त्वपूर्ण भूमि भएको स्पष्ट पार्नुभएको छ। विगतमा अमेरिकाका चारजना राष्ट्रपतिहरूका लागि राष्ट्रगान गाउनुभएकी मिलवेन सन् २०२३ मा प्रधानमन्त्री नरेन्द्र मोदीको अमेरिका भ्रमणका क्रममा सम्मानस्वरूप उनको खुट्टा ढोगेका कारण पनि चर्चामा रहनुभएको थियो। उहाँले अमेरिकामा भारतीय र एसियाली समुदायको ठूलो कदर रहेको भन्दै ट्रम्पको सोचलाई ऐना देखाउनुभएको छ।