‎बानरहाट: डुवर्समा फेरि एक दर्दनाक सडक दुर्घटनामा दुई युवकको ज्यान गएको छ। जलपाईगुडी जिल्लाको बानरहाट प्रखण्डस्थित मोराघाट मोड नजिक रहेको हिन्दी महाविद्यालयअगाडि तीव्र गतिमा रहेको दुईपाङ्ग्रे सवारी दुर्घटनामा रिभर्स टिज्ञा (१५) र अभय कर्ण (१९) को मृत्यु भएको हो। दुवै जना गयरकाटा क्षेत्रको लोदर लाइनका निवासी थिए। घटनापछि सम्पूर्ण क्षेत्रमा शोकको वातावरण छाएको छ।
‎पुलिस तथा परिवार स्रोतका अनुसार तीव्र गतिमा दुईपाङ्ग्रे सवारी चलाउने क्रममा नियन्त्रण गुमाउँदा दुर्घटना भएको हो। घटनास्थलमै दुवै युवक गम्भीर घाइते भएका थिए। पछि उनीहरूलाई अस्पताल लगिएको भए पनि चिकित्सकहरूले मृत घोषणा गरेका थिए।
‎यता, छुट्टाछुट्टै दुई अन्य दुर्घटनामा गम्भीर घाइते भएका थप दुई जनालाई अस्पतालमा भर्ना गरिएको छ। बानरहाट प्राथमिक स्वास्थ्य केन्द्रमा आफन्तहरूको रुवाबासीले वातावरण निकै भावुक बनेको थियो।
‎घटनाको जानकारी पाएलगत्तै बानरहाट थाना प्रहरी घटनास्थलमा पुगेको थियो र सम्पूर्ण घटनाको अनुसन्धान सुरु गरिएको छ। प्रहरी स्रोतका अनुसार शव परीक्षणपछि मृतकहरूको शव परिवारलाई जिम्मा लगाइनेछ। यस हृदयविदारक घटनाले सम्पूर्ण डुवर्स क्षेत्र शोकमग्न बनेको छ।