नयाँ दिल्ली: ​अमेरिकी राष्ट्रपति डोनाल्ड ट्रम्प आफ्नो तीन दिने राजकीय चीन भ्रमण सम्पन्न गरी शुक्रबार बेइजिङबाट स्वदेश प्रस्थान गरेका छन्। भ्रमणको अन्तिम दिन उनले चिनियाँ राष्ट्रपति शी जिनपिङसँग बेइजिङको अति सुरक्षित र रणनीतिक शक्ति केन्द्र ‘झोङनान्हाई’ परिसरमा निर्णायक वार्ता गरेका थिए। विमानस्थल प्रस्थान गर्नुअघि राष्ट्रपति ट्रम्पले सञ्चारकर्मीहरूसँग कुरा गर्दै चीनसँग अत्यन्तै महत्वपूर्ण व्यापारिक सम्झौता भएको र यसबाट दुवै राष्ट्रलाई दीर्घकालीन फाइदा पुग्ने दाबी गरे।
​राष्ट्रपति शी जिनपिङले ट्रम्पको यो भ्रमणलाई दुई देशबीचको सम्बन्धमा एक नयाँ र सकारात्मक रणनीतिको ‘कोसेढुङ्गा’ भएको बताएका छन्। झोङनान्हाईको ऐतिहासिक बगैँचामा सयर गर्दै गर्दा दुई नेताबीच इरानको परमाणु मुद्दा, ताइवानको सुरक्षा र रेयर अर्थ मिनरल्स जस्ता संवेदनशील विषयमा गहन छलफल भएको थियो। राष्ट्रपति ट्रम्पले इरानको विषयमा दुवै देशको सोच मिलेको बताए पनि चिनियाँ पक्षले भने सार्वजनिक रूपमा यसबारे कुनै औपचारिक टिप्पणी गरेको छैन।
​भ्रमणका क्रममा दुई नेताहरूबीच व्यक्तिगत निकटता समेत देखिएको छ। ट्रम्पले जिनपिङलाई आफ्नो ‘सच्चा मित्र’ को संज्ञा दिएका छन् भने जिनपिङले उपहारस्वरूप चिनियाँ गुलाफको बीउ पठाउने बाचा गरेका छन्। यद्यपि, बेइजिङका स्थानीय बासिन्दाहरूले भने ट्रम्पको छविलाई ‘अप्रत्याशित’ भन्दै उनको कूटनीतिक कदमलाई सावधानीपूर्वक नियालिरहेका छन्।
​भ्रमणको अन्त्यमा राष्ट्रपति ट्रम्पले आगामी सेप्टेम्बर २४ मा चिनियाँ राष्ट्रपतिले अमेरिकाको भ्रमण गर्ने घोषणा समेत गरेका छन्। बेइजिङ क्यापिटल इन्टरनेशनल एयरपोर्टमा चिनियाँ विदेशमन्त्री वाङ यीले ट्रम्पलाई विशेष ‘गार्ड अफ अनर’ सहित बिदाइ गरे। विमानको सिँढीबाट हात हल्लाउँदै राष्ट्रपति ट्रम्प वासिङ्टनका लागि प्रस्थान गर्दा चिनियाँ बालबालिकाहरूले दुवै देशका झण्डा हल्लाएर उनलाई बिदाइ गरेका थिए।