​मंगन: स्वैच्छिक रक्तदाताहरूको अमूल्य योगदानको कदर गर्न र रक्तदानको महत्त्वबारे जनचेतना जगाउने उद्देश्यका साथ जिला अस्पताल मंगनको रक्त भण्डारण एकाइमा विश्व रक्तदाता दिवस मनाइयो। यस कार्यक्रममा भर्खरै स्थापना भएको रक्त भण्डारण एकाइको उपलब्धिलाई पनि उजागर गरियो, जसले जिल्लाभित्र रगतको उपलब्धतालाई निकै सहज बनाएको छ। कार्यक्रममा मुख्य चिकित्सा अधिकारी एवं निर्देशक डा. अनिता भूटिया, ए.एन.एस. सुश्री सरिता, |हिमालयन चर्चका प्रतिनिधिहरू, नर्दन राइडर्स मोटरसाइकल क्लब, कार्यक्रम अधिकारीहरू, सिक्किम प्यारामेडिक्स एशोसिएशनका सदस्यहरू र अस्पतालका कर्मचारीहरूको उपस्थिति रहेको थियो।
​कार्यक्रमको सुरुवात जिल्ला अस्पताल मंगनकी प्याथोलोजिस्ट डा. शेखा सुब्बाको स्वागत मन्तव्यबाट भएको थियो। उनले यस वर्षको नारा “मानवताको एक थोपा। रगत दिनुहोस्। जीवन बचाउनुहोस्।” मा केन्द्रित रहँदै विश्व रक्तदाता दिवसको महत्त्वमाथि प्रकाश पारिन्। उनले सुरक्षित रगतको आवश्यकता र स्वैच्छिक रक्तदाताहरूलाई धन्यवाद दिन हरेक वर्ष जुन १४ तारिखमा यो दिवस मनाइने बताइन्। त्यसपछि, मुख्य चिकित्सा अधिकारी डा. अनिता भूटियाले रक्त समूह पत्ता लगाएर चिकित्सा विज्ञानमा क्रान्ति ल्याउने डा. कार्ल ल्यान्डस्टाइनरप्रति श्रद्धाञ्जली अर्पण गरिन्। उनले मंगनमा रक्त भण्डारण एकाइको स्थापना भएपछि बिरामीहरू आकस्मिक अवस्थामा गान्तोक कुद्नुपर्ने बाध्यता हटेको बताइन्। यो सेवा अस्पतालमा डायलासिस गराइरहेका बिरामी, मिर्गौलाका दीर्घकालीन रोगी, रक्तअल्पता भएका बिरामी र आपतकालीन अवस्थाका लागि वरदान साबित भएको उनले उल्लेख गरिन्।
​जिल्लामा रक्त सञ्चार सेवालाई सुदृढ बनाउन उत्कृष्ट योगदान पुर्‍याउने संघसंस्था तथा व्यक्तिहरूलाई कार्यक्रममा सम्मान गरिएको थियो। विगतको रक्तदान शिविरमा सक्रिय सहभागिता जनाएबापत हिमालयन चर्च, नर्दन राइडर्स मोटरसाइकल क्लब और सिक्किम प्यारामेडिक्स एशोसिएशनलाई सम्मानित गरियो भने रक्त भण्डारण एकाइलाई सफलतापूर्वक सञ्चालन गरेकोमा त्यहाँका प्राविधिक तथा कर्मचारीहरूलाई पनि सम्मान गरियो। यसका साथै, तीन स्वैच्छिक रक्तदाताहरू श्री छिरिङ नोर्बु भोटिया, श्री रिन्जिङ दोर्जी लेप्चा र श्री सङ्गे तेन्जिङ जोङतेन्पालाई उनीहरूको निस्वार्थ रक्तदानको लागि विशेष रूपमा सम्मानित गरियो। कार्यक्रममा सुश्री मालती शर्माले रक्तदानका लागि आवश्यक मापदण्डबारे जानकारीमूलक सेसन सञ्चालन गरेकी थिइन्। साथै, आगामी २ जुलाई २०२६ का दिन जिल्ला अस्पताल मंगनमा ‘प्यारामेडिक्स डे’ को अवसर पारेर बृहत रक्तदान शिविर आयोजना हुन गइरहेको जानकारी दिँदै सबैलाई रक्तदान गर्न अपिल गरियो।