मुम्बई: बलिउड अभिनेत्री सोनाली बेंद्रविरुद्ध पुणेको एक किसानले उनको जमिनमा अवैध कब्जा गरेको आरोप लगाएका छन्। किसानको दाबी अनुसार मावल क्षेत्रको करिब १.२ बीघा जमिनमा उनको पारिवारिक तथा वंशानुगत अधिकार छ।
आरोपअनुसार किसान चन्द्रकान्त शिन्डेले उक्त जमिन सन् १९५७ देखि आफ्नो पैतृक सम्पत्ति भएको दाबी गरेका छन्। तर उक्त जमिन अवैध रूपमा सोनाली बेंद्र र उनका पति गोल्डी बहलले किनेको आरोप लगाइएको छ। साथै जमिनमा अवैध निर्माण गर्ने प्रयास गरिएको र परिवारलाई धम्की दिइएको पनि आरोपमा उल्लेख छ।
यस घटनामा सोनाली बेंद्र, उनका पति गोल्डी बहल र अन्य दुई व्यक्तिविरुद्ध अदालतमा मुद्दा दायर गरिएको छ। मुद्दाको सुनुवाइ २० अप्रिलमा हुने बताइएको छ।
अर्कोतर्फ सोनाली बेंद्रले सबै आरोप अस्वीकार गरेकी छन्। उनका अनुसार कुनै पनि सरकारी कागजात वा खरिद–बिक्रीको अभिलेखमा उनको नाम छैन, त्यसैले आरोप पूर्ण रूपमा आधारहीन छ। उनले यो आरोप रकम असुलीको उद्देश्यले लगाइएको दाबी गरेकी छन्।
अभिनेत्रीका वकिलले किसानले यसअघि पनि विभिन्न सरकारी कार्यालयमा उजुरी दिएका भए पनि सबै निवेदन खारेज भएको बताएका छन्। अब मुद्दाको आगामी सुनुवाइको प्रतीक्षा भइरहेको छ।