​गान्तोक: विशेष गहन पुनरीक्षण (एसआईआर) २०२६ अन्तर्गत गणना फाराम (ईएफ) वितरण अभियानको १२औँ दिनसम्म गान्तोक जिल्लाले उल्लेखनीय प्रगति हासिल गरेको छ। प्राप्त रिपोर्ट अनुसार, जिल्लाका योग्य मतदाताहरूमध्ये अहिलेसम्म ७५.५६ प्रतिशतलाई गणना फाराम वितरण गरिसकिएको छ।
​यस अभियानको १२औँ दिनसम्ममा जिल्लाभरिका जम्मा १,२२,२४० योग्य मतदाताहरूमध्ये कुल ९२,३६१ वटा गणना फाराम वितरण भइसकेको छ। यो ठुलो उपलब्धि बूथस्तरीय अधिकारी (बीएलओ)-हरूको अथक र समर्पित प्रयासका कारण सम्भव भएको बताइएको छ। अधिकारीहरूले विभिन्न दुर्गम क्षेत्र र चुनौतीपूर्ण भौगोलिक भुभागहरू पार गर्दै योग्य मतदाताहरूकहाँ पुगेर फाराम वितरण गरेका छन्।
​विशेष गरी, शारीरिक रूपमा अशक्त (दिव्याङ्ग) व्यक्तिहरू तथा ज्येष्ठ नागरिकहरूलाई उच्च प्राथमिकता दिँदै बीएलओहरू आफै घर-घरमै पुगेर सेवा प्रदान गरिरहेका छन्। बूथस्तरीय अधिकारीहरूद्वारा घर-घरमा पुगेर गणना फाराम वितरण गर्ने तथा सङ्कलन गर्ने यो विशेष कार्य आगामी २८ जून, २०२६ सम्म निरन्तर जारी रहने जानकारी दिइएको छ।