‎कोलकाता: कोलकाताको ब्रिगेड परेड ग्राउन्डमा राज्यमा पहिलो पटक गठन भएको भारतीय जनता पार्टी सरकारको शपथ ग्रहण समारोहका क्रममा भावनात्मक वातावरण सिर्जना भएको थियो। राजनीतिक हिंसामा ज्यान गुमाएका पार्टी कार्यकर्ताहरूको स्मृतिमा विशेष स्मारक तथा श्रद्धाञ्जली मञ्च स्थापना गरिएको थियो।
कार्यक्रममा जलपाईगुडी जिल्लाको राजगञ्ज विधानसभा क्षेत्रका पार्टी कार्यकर्ता उलेन राय लगायत विभिन्न समयमा ज्यान गुमाएका अन्य कार्यकर्ताहरूलाई सम्झना गरिएको थियो। जानकारी अनुसार उलेन राय ‘उत्तरकन्या अभियान’ का क्रममा आफ्नो ज्यान गुमाएका थिए।
‎उपस्थित पार्टी नेता, कार्यकर्ता तथा समर्थकहरूले दिवङ्गत सबै कार्यकर्ताप्रति श्रद्धाञ्जली अर्पण गर्दै उनीहरूको बलिदानलाई स्मरण गरेका थिए।
‎पार्टी स्रोतका अनुसार पश्चिम बंगालमा लामो समयदेखि धेरै पार्टी कार्यकर्ता तथा समर्थकहरू राजनीतिक हिंसाको शिकार हुँदै आएका छन्। उनीहरूको स्मरण तथा योगदानको सम्मानस्वरूप यो श्रद्धाञ्जली कार्यक्रम आयोजना गरिएको हो।