​कालिम्पोङ: पश्चिम बंगालको कालिम्पोङस्थित भारत क्षेत्री हक्की स्टेडियममा शुक्रबारदेखि ‘दोस्रो स्वर्गीय केबी क्षेत्री गोल्डकप हक्की प्रतियोगिता-२०२६’ भव्यताका साथ सुरु भएको छ।
​चार दिनसम्म सञ्चालन हुने उक्त प्रतियोगिताको उद्घाटन समारोहमा कालचिनी (एसटी) निर्वाचन क्षेत्रका विधायक एवम् पश्चिम बंगाल सरकारका राज्यमन्त्री विशाल लामा प्रमुख अतिथिका रूपमा सहभागी हुनुभएको थियो।
​भारतीय राष्ट्रिय हक्की टोलीका पूर्वकप्तान तथा प्रतिष्ठित मेजर ध्यानचन्द पुरस्कार विजेता एवम् कालिम्पोङ विधानसभा क्षेत्रका माननीय विधायक भारत क्षेत्रीको विशेष पहलमा यो प्रतियोगिता आयोजना गरिएको हो। कालिम्पोङ जिल्ला खेलकुद संघ (डीएसए) को सहयोगमा भारत क्षेत्री हक्की एकेडेमीद्वारा आयोजित यस प्रतियोगिता कात्तिक १४ देखि १७ गते (अक्टोबर ३० देखि नोभेम्बर २) सम्म सञ्चालन हुनेछ। प्रतियोगितामा यू–१६ (१६ वर्षमुनि) छात्र र यू–१९ (१९ वर्षमुनि) छात्रा समूहका खेलाडीहरूको सहभागिता रहेको छ।
​उद्घाटन समारोहलाई सम्बोधन गर्दै प्रमुख अतिथि राज्यमन्त्री लामाले युवा प्रतिभाहरूलाई प्रोत्साहन गर्न, खेलकुद संस्कृतिको प्रवर्द्धन गर्न र भारतीय हक्कीलाई नयाँ उचाइमा पुर्‍याउन यस्ता प्रतियोगिताहरूले महत्त्वपूर्ण भूमिका खेल्ने बताउनुभयो। साथै, उहाँले प्रतियोगितामा सहभागी विभिन्न राज्यका खेलाडी तथा टोलीहरूलाई उत्कृष्ट खेल कौशल, अनुशासन र खेल भावना प्रदर्शन गर्न शुभकामना व्यक्त गर्नुभयो।