​काठमाण्डू: क्याम्बोडिया र म्यान्मारतिर जस्तै प्रकारको ‘स्क्यामिङ सेन्टर’ चलाउने दाउमा रहेका विदेशीहरूलाई पुलिसले काठमाण्डूबाट पक्राउ गरेको छ। टूरिस्टहरूको मुख्य अड्डा ठमेल क्षेत्रबाट गत शुक्रवार मात्रै १५ जना बाङ्ग्लादेशी अनि ४ जना भारतीय नागरिकहरू समातिएका छन्।
​काठमाण्डू उपत्यका अपराध अनुसन्धान कार्यालयको भनाइअनुसार, उनीहरूलाई एउटा चिनियाँ नागरिकले चलाएको साइबर ठगीको धन्दा (स्क्यामिङ सेन्टर) मा काममा लगाइएको थियो। मेन चिनियाँ सञ्चालक भने अहिले फरार छ। पुलिस सोधपुछमा थाहा लागेअनुसार, पक्राउ परेका धेरैजसो बाङ्ग्लादेशीहरू यसअघि क्याम्बोडियामै काम गर्थे र त्यहीँ चिनजान भएको चिनियाँले उनीहरूलाई नेपाल ल्याएको हो। ठमेलको त्यो सेन्टरबाट कम्प्युटर र मोबाइलसहित धेरै वटा इलेक्ट्रोनिक सामान जफत गरिएको छ। उनीहरूले सोसल मिडियामा अश्लील फोटोहरू पठाएर मान्छेलाई ब्ल्याकमेल गर्ने अनि पैसा असुल्ने धन्दा चलाइरहेका थिए। यो सेन्टर चलाउन ठमेलको एउटा होटल नै महिनाको ७ लाख रुपैयाँ भाडा तिर्ने गरी लिइएको थियो।
​यता, पुलिसले नक्साल एरियाबाट पनि यस्तै अर्को स्क्यामिङ सेन्टर चलाउने २ जना चिनियाँ, २ जना भारतीय र १६ जना नेपाली युवतीहरूलाई पक्राउ गरेको छ। उनीहरू चाहिँ भिडिओ कलको नयाँ एप्स चलाएर ठगी गर्थे। यसबाहेक, पुलिसले ठमेल क्षेत्रमा शङ्कास्पद धन्दा गर्ने र भिसा सकिएर पनि बसिरहेका युगान्डा, भियतनाम र केन्याका ४३ जना विदेशी महिलाहरूलाई पनि समातेको छ। क्याम्बोडिया र म्यान्मारमा कडाइ भएपछि अन्तर्राष्ट्रिय साइबर क्रिमिनलहरूले अहिले नेपाललाई आफ्नो नयाँ अड्डा बनाउन खोजिरहेको पुलिसको आशङ्का छ।