​बुनिया (काङ्गो): अफ्रिकी मुलुक काङ्गोमा इबोला भाइरसको प्रकोप लगातार भयावह बन्दै गएको छ। देशको स्वास्थ्य मन्त्रालयले सार्वजनिक गरेको पछिल्लो विवरण अनुसार इबोला सङ्क्रमणका कारण हालसम्म ९३० जनाको ज्यान गइसकेको छ। पछिल्लो २४ घण्टामा मात्रै ३७ जनाको मृत्यु दर्ता गरिएको छ, जुन यस प्रकोप अवधिभरिकै एकै दिनमा भएको उच्च मृत्यु सङ्ख्यामध्ये एक हो।
​स्वास्थ्य मन्त्रालयका अनुसार गत शनिबारसम्म इबोलाका २,३४४ वटा मामिला पुष्टि भइसकेका छन्। गत जेठ २ गते (१५ मे) पूर्वी काङ्गोमा घोषणा गरिएको यो इबोला प्रकोपलाई हालसम्मकै सबैभन्दा तीव्र गतिमा फैलिरहेको प्रकोप मानिएको छ। हाल ७२४ जना बिरामीहरू विभिन्न अस्पताल तथा आइसोलेसन केन्द्रहरूमा उपचाररत छन्। सङ्क्रमणको चपेटामा परेर ३६ जना स्वास्थ्यकर्मीले समेत ज्यान गुमाइसकेका छन्। स्वास्थ्य मन्त्रालयले प्रभावित क्षेत्रहरूमा उपचार र नियन्त्रण अभियानलाई तीव्र बनाएको छ भने पछिल्लो २४ घण्टामा २२ जना बिरामी निको भएर घर फर्किएका छन्। यस पटकको सङ्क्रमण ‘बुन्डिबुग्यो’ भाइरसका कारण फैलिरहेको र यसका लागि हालसम्म कुनै स्वीकृत खोप वा प्रभावकारी उपचार उपलब्ध नरहेको मन्त्रालयले जनाएको छ।
​हालसम्म पूर्वी काङ्गोका पाँचवटा प्रान्तहरू यस महामारीको चपेटामा परिसकेका छन्, जहाँ पहिलेदेखि नै विद्रोही हिंसाका कारण अशान्त माहौल रहेको छ। अधिकारीहरूका अनुसार प्रकोप घोषणा भएयता स्वास्थ्य केन्द्र र चिकित्सा टोलीहरूमाथि १२ पटक आक्रमण भइसकेको छ। रोगलाई लिएर फैलिएका विभिन्न अफवाह र शङ्काका कारण स्थानीय बासिन्दाहरूबाटै यी आक्रमणहरू भएका हुन्। अर्कातर्फ, लामो समयदेखि तलब नपाएको विरोधमा कतिपय स्वास्थ्यकर्मीहरूले काम समेत छोडेका छन्।
​विश्व स्वास्थ्य सङ्गठन (डब्ल्यूएचओ) ले गत हप्ता मात्रै चिन्ता व्यक्त गर्दै ८० प्रतिशत नयाँ मामिलाहरू त्यस्ता सङ्क्रमण स्रोतहरूबाट फेला परिरहेको जनाएको छ, जसको पहिचान नै हुन सकेको छैन। यसले भाइरस स्वास्थ्य अधिकारीहरूको निगरानी र नियन्त्रण क्षमताभन्दा तीव्र गतिमा फैलिरहेको सङ्केत गर्दछ।
इबोला एक अत्यधिक संक्रामक रोग हो, जुन जङ्गली जनावरहरूबाट मानिसमा सर्ने गर्दछ। त्यसपछि सङ्क्रमित व्यक्तिको रगत, वान्ता वा शारीरिक तरल पदार्थ एवं सङ्क्रमित कपडा र ओछ्यानको सम्पर्कबाट यो अन्य मानिसहरूमा फैलिने गर्दछ। सबैभन्दा बढी प्रभावित इतुरी प्रान्तमा सुरक्षासम्बन्धी चुनौतीका कारण राहत तथा बचाउ कार्यहरू नराम्ररी प्रभावित भइरहेका छन्।