राष्ट्र निर्माणमा युवाको भूमिका महत्वपूर्ण रहने खेलकुद मन्त्री बस्नेतको भनाइ

​गान्तोक: सिक्किम सरकारका खेलकुद तथा युवा मामिला मन्त्री राजु बस्नेतले शुक्रबार गान्तोकको एससी भवनमा आयोजित एक विशेष समारोहका बीच ‘उत्तर-पूर्वी राष्ट्रिय सेवा योजना (एनएसएस) महोत्सव २०२६’ को औपचारिक उद्घाटन गरेका छन्। पाँच दिनसम्म चल्ने यस महोत्सवको उद्घाटन सत्रमा खेलकुद मन्त्री बस्नेत मुख्य अतिथिका रूपमा उपस्थित थिए।
​सो अवसरमा बोल्दै मन्त्री बस्नेतले एनएसएसको मूल आदर्श वाक्य “म होइन, तपाईं” (नॉट मी बट यू) को महत्वमाथि प्रकाश पार्दै यस अभियानले युवाहरूमा जिम्मेवारी, नेतृत्व र सेवाभावको भावना विकास गर्ने बताए। उनले देशको प्रगति युवाहरूको प्रतिबद्धता र सक्रिय सहभागितामा निर्भर रहने उल्लेख गर्दै उत्तर-पूर्वी क्षेत्रको सांस्कृतिक विविधतालाई ‘अष्टलक्ष्मी’ का रूपमा व्याख्या गरे।
​महोत्सवको पहिलो दिन आठवटा उत्तर-पूर्वी राज्यहरू- अरुणाचल प्रदेश, असम, मणिपुर, मेघालय, मिजोरम, नागाल्यान्ड, सिक्किम र त्रिपुराका युवा स्वयंसेवकहरूले आ-आफ्नो क्षेत्रको समृद्ध सांस्कृतिक परम्परा झल्काउने आकर्षक सांस्कृतिक प्रस्तुतीहरू प्रदर्शन गरेका थिए।
​कार्यक्रममा खेलकुद विभागका सल्लाहकार विक्रम प्रधान, राज्य खेलकुद विकास बोर्डका अध्यक्ष रिन्जिङ डब्ल्यु चोफेल, युवा मामिला विभागकी सचिव याङचेन डी तामाङ लगायत केन्द्र तथा राज्य सरकारका वरिष्ठ अधिकारीहरूको उपस्थिति थियो।