​नाम्ची: नाम्चीस्थित जिल्ला प्रशासनिक केन्द्रमा बिहीबार एकीकृत आर्थिक समावेशीकरण कार्ययोजना सम्बन्धी जिल्ला कार्यान्वयन तथा संस्थागत टोलीको अभिमुखीकरण बैठक सम्पन्न भएको छ। नाम्चीका जिल्लापाल एवम् परियोजनाकी अध्यक्ष अनुपा ताम्लिङको अध्यक्षतामा उक्त बैठक बसेको हो।
​बैठकलाई सम्बोधन गर्दै जिल्लापाल ताम्लिङले अभिमुखीकरणका मुख्य उद्देश्यहरूमाथि प्रकाश पार्दै टोलीका सदस्यहरूले आफ्ना जिम्मेवारी र भूमिकाहरू स्पष्ट रूपमा बुझ्नुपर्नेमा जोड दिइन्। परियोजनालाई जिल्लाभर प्रभावकारी रूपमा कार्यान्वयन गर्न सदस्यहरूलाई सृजनात्मक ढङ्गले सोच्न र नवीन विचारहरू प्रस्तुत गर्न उनले आग्रह गरिन्।
​उनले परियोजनाको दीर्घकालीन दिगोपन, सामूहिक उत्तरदायित्व र सबै सरोकारवालाहरूको सक्रिय सहभागितामार्फत समावेशी नतिजा हासिल गर्न सकिने बताइन्।
​बैठकमा शियारी देवबर्माले परियोजनाको दूरदृष्टिबारे प्रस्तुतीकरण दिँदै गैर-कृषि क्षेत्रमा दिगो रोजगारीका अवसरहरू र उद्यमशीलतामार्फत महिला तथा युवाहरूको आर्थिक समावेशीकरण गर्ने परियोजनाको मुख्य लक्ष्य रहेको जानकारी दिइन्। उनले नाम्ची जिल्लाका लागि तय गरिएका मुख्य कार्ययोजनाहरूबारे पनि चर्चा गरिन्।
​प्रस्तुतीकरणका क्रममा टोलीको संरचना, सम्बन्धित विभागहरूसँग समन्वय गरी परियोजनाको प्रगतिको अनुगमन गर्ने सदस्यहरूको भूमिका र हाल देखिएका चुनौतीहरूलाई सम्बोधन गर्ने रणनीतिबारे छलफल गरिएको थियो।
​बैठकमा उपस्थित अधिकारीहरूले परियोजनाको प्रभावकारिता बढाउन आफ्ना सुझाव र विचारहरू प्रस्तुत गरेका थिए। कार्यक्रममा अतिरिक्त जिल्लापाल तिर्साङ तामाङ, राज्य ग्रामीण विकास संस्थानकी अतिरिक्त निर्देशक चन्द्रकला राई, औद्योगिक तालिम संस्थानका प्राचार्य महेन्द्र प्रधान, पर्यटन सह-निर्देशक लामिन तिङ, जिल्ला उद्योग केन्द्र नाम्चीका महाप्रबन्धक दिनेश प्रधान लगायत विभिन्न विभागका प्रतिनिधिहरूको उपस्थिति रहेको थियो।