​पाकिम: पाकिम जिल्ला अन्तर्गत पर्ने आहो-याङताम सडक खण्डको जीर्ण अवस्थालाई लिएर स्थानीय बासिन्दाहरूबाट प्राप्त लगातारको जनगुनासोका आधारमा जिल्लापाल परी बिश्नोईले आज एक विशेष टोलीसहित प्रभावित क्षेत्रको स्थलगत निरीक्षण गर्नुभएको छ। यस आकस्मिक निरीक्षण भ्रमणमा उहाँको साथमा अतिरिक्त जिल्लापाल (एडीसी) पुलकित, स्थानीय पञ्चायत प्रतिनिधिहरू, ग्रामीण विकास विभाग र सडक तथा पुल विभागका उच्च अधिकारीहरूका साथै स्थानीय सर्वसाधारणको ठुलो उपस्थिति रहेको थियो।
​निरीक्षणका क्रममा सडकमुनि भइरहेको निर्माण कार्यका कारण सडकको एउटा ठुलो भाग क्षतिग्रस्त भएको र यसले गर्दा स्थानीय जनजीवन तथा सवारी आवागमनमा ठुलो बाधा उत्पन्न भएको पाइयो। उक्त सडक राष्ट्रिय राजमार्ग ७१७ए-सँग जोडिने एउटा महत्त्वपूर्ण मार्ग हुनुका साथै चारवटा ग्राम पञ्चायत एकाइहरूलाई जोड्ने मुख्य लाइफलाइन भएकाले स्थानीय बासिन्दाहरूले आफ्नो दैनिक कार्य सञ्चालनमा निकै कठिनाइ भोग्नुपरिरहेको छ।
​जिल्लापाल परी बिश्नोईले क्षतिग्रस्त क्षेत्रको कुना-कुना पुगेर क्षतिको वास्तविक अवस्थाको मूल्याङ्कन गर्नुभयो। उहाँले सडकको यस्तो बेहाल अवस्था सिर्जना हुनुका कारणहरूबारे अधिकारीहरूबाट जानकारी लिँदै समस्या समाधानका लागि भइरहेको अस्थायी पुनर्स्थापना कार्यको पनि समीक्षा गर्नुभयो। जिल्लापालले यस मामिलालाई गम्भीरतापूर्वक लिँदै सम्बन्धित सबै विभागका प्रतिनिधिहरू सामेल भएको एउटा विशेष समिति गठन गर्ने निर्देश दिनुभएको छ। यस समितिले सडक मर्मतसम्भार, पुनर्स्थापनाका उपायहरू तथा क्षतिको प्राविधिक कारणबारे विस्तृत अध्ययन गरेर तोकिएको समयभित्रै आफ्नो प्रतिवेदन पेश गर्नुपर्नेछ।
​निरीक्षणको अवधि यस क्षेत्रमा फोहोर व्यवस्थापनसम्बन्धी गम्भीर समस्या पनि देखिएकाले उहाँले क्षेत्रको सरसफाईमा विशेष ध्यान दिन आवश्यक रहेको बताउनुभयो। साथै, आगामी मनसुनको समयमा सम्भावित बाढी र पहिरोको जोखिमलाई न्यूनीकरण गर्नका निम्ति पानीको सहज निकास सुनिश्चित गर्न पर्याप्त नाली (ड्रेनेज) व्यवस्थापनको आवश्यकता औंल्याउँदै सम्बन्धित निकायहरूलाई तुरुन्तै कदम चाल्न निर्देश दिनुभयो।
​यसै गरी, एडीसी पुलकितले समस्याको स्थायी समाधानका लागि कतिपय महत्त्वपूर्ण सुझाउहरू प्रस्तुत गर्दै जनतालाई भइरहेको असुविधालाई कम गर्न क्षतिग्रस्त सडकको शीघ्र पुनर्स्थापनामा जोड दिनुभयो। सडक तथा पुल विभागका अधिकारीहरूले भने क्षतिग्रस्त सडक खण्डको स्थायी पुनर्स्थापना कार्य सुरु भइसकेको जानकारी गराउँदै काम पूरा नभएसम्म सुरक्षित आवागमनका लागि अस्थायी उपायहरू लागू गरिने प्रतिबद्धता जनाएका छन्। भ्रमणका क्रममा स्थानीय बासिन्दाहरूले जिल्लापाल समक्ष आफ्ना दुःख र गुनासाहरू राखेका थिए, जसलाई सम्बोधन गर्दै अधिकारीहरूले यथाशीघ्र समस्या समाधान गर्ने आश्वासन दिएका छन्।