​काठमाडौं: गत भदौमा भएको ‘जेन-जी’ आन्दोलनका प्रमुख अनुहारमध्येका एक नेपालका गृहमन्त्री सुदन गुरुङले आफ्नो आर्थिक कारोबारलाई लिएर उत्पन्न विवादका कारण बुधबार पदबाट राजीनामा दिएका छन्।
​पछिल्ला दिनहरूमा सम्पत्ति शुद्धीकरणको आरोपमा प्रहरी हिरासतमा रहेका विवादित व्यवसायी दीपक भट्टसँग गुरुङको व्यावसायिक सम्बन्ध रहेको भन्दै उनी चर्चामा थिए।
​गुरुङले सामाजिक सञ्जालमार्फत आफ्नो राजीनामा घोषणा गरेका हुन्। उनले फेसबुकमा लेखेका छन्, “ममाथि उठेका प्रश्नहरूको निष्पक्ष छानबिन सुनिश्चित गर्न र पदमा बहाल रहँदा स्वार्थको द्वन्द्व (Conflict of Interest) नहोस् भन्नका लागि आजैका मितिदेखि लागु हुने गरी मैले गृहमन्त्री पदबाट राजीनामा दिएको छु। मेरा लागि पदभन्दा नैतिकता ठूलो हो र जनविश्वासभन्दा ठूलो कुनै शक्ति हुँदैन।”
​गत चैत ५ गते सम्पन्न निर्वाचनपछि चैत १४ (मार्च २७) मा प्रधानमन्त्री बालेन्द्र शाहको नेतृत्वमा गठित नयाँ सरकारबाट एक महिना नपुग्दै बाहिरिने उनी दोस्रो क्याबिनेट मन्त्री हुन्।
​प्रधानमन्त्री बालेन्द्र शाह र अन्य मन्त्रीहरूसँगै गुरुङले पनि चैत ३० (अप्रिल १२) मा आफ्नो सम्पत्ति विवरण सार्वजनिक गरेका थिए। सार्वजनिक विवरण अनुसार उनी मन्त्रिपरिषद्कै सबैभन्दा धनी मन्त्रीहरूमध्ये एक देखिएका थिए। उनको नगद मौज्दात, विभिन्न कम्पनीको सेयर र विशेष गरी जग्गाको स्वामित्व कानुनले तोकेको सीमाभन्दा धेरै बढी पाइएको थियो।
​आफ्नो सम्पत्तिलाई लिएर सामाजिक सञ्जालमा प्रतिरक्षा गर्दै उनले लेखेका थिए, “गरिब भएर जन्मनु व्यक्तिको गल्ती होइन, तर गरिब भएर मर्नु गल्ती हो। सरकारमा जानुअघि भ्रष्टाचार नगरी सम्पत्ति कमाउनु पाप होइन; सरकारमा गएपछि भ्रष्टाचार गरेर कमाउनु चाहिँ पाप हो।”
​यद्यपि, उनले सार्वजनिक गरेको सम्पत्तिको स्रोतमाथि प्रश्नहरू उठिरहेका थिए। पछि उनी विवादित व्यवसायी भट्टद्वारा प्रवर्द्धित एक लघु-बीमा कम्पनीमा लगानीकर्ता रहेको खुलासा भएपछि उनको व्यावसायिक सम्बन्धलाई लिएर चिन्ता थप बढेको थियो। गुरुङ गोरखा क्षेत्र नम्बर १ बाट प्रतिनिधि सभामा निर्वाचित भएका थिए।