विकसित बंगाल’ को मार्गचित्रबारे छलफल

​कोलकाता: आरपी-संजीव गोयन्का ग्रुपका अध्यक्ष डा. संजीव गोयन्काले पश्चिम बंगालका माननीय मुख्यमन्त्री श्री सुभेन्दु अधिकारीसँग राज्य सचिवालय ‘नवान्न’ मा भेटवार्ता गर्नुभएको छ।
​उहाँहरूबीचको छलफल मुख्यत: पश्चिम बंगालको समृद्धि, औद्योगिक पारिस्थितिकी प्रणाली (इकोसिस्टम) लाई सुदृढ बनाउने अवसर, लगानी आकर्षण, रोजगारी सिर्जना र राज्यको विश्वव्यापी प्रतिस्पर्धात्मकता बढाउने विषयहरूमा केन्द्रित थियो। भारतकै प्रमुख आर्थिक संवाहक (ग्रोथ इन्जिन) का रूपमा पुन: उदाउनका लागि पश्चिम बंगालसँग पर्याप्त प्रतिभा, गौरवमय इतिहास, बलियो पूर्वाधार र उद्यमशील भावना रहेको सन्दर्भमा दुवै पक्ष सहमत देखिए। यद्यपि, यो सम्भावनालाई यथार्थमा बदल्न लगानीकर्ताहरूको आत्मविश्वास र सरकार एवं उद्योग क्षेत्रबीच रचनात्मक साझेदारी आवश्यक रहेको कुरामा जोड दिइयो।
​भेटका क्रममा मुख्यमन्त्री श्री सुवेन्दु अधिकारी र डा. संजीव गोयन्काले ‘विकसित बंगाल’ को साझा दृष्टिकोणबारे गहन विचार-विमर्श गर्नुभयो। गोयन्का परिवार विगत २२० वर्षभन्दा बढी समयदेखि बंगालमा गहिरो गरी जोडिएको छ। आर्थिक उतारचढावका बाबजुद राज्यलाई नछोडी यहीँ लगानी गर्न, संरचना निर्माण गर्न र अवसरहरू सिर्जना गर्न यो समूह प्रतिबद्ध रहँदै आएको छ। हाल डा. संजीव गोयन्का पूर्वी भारतकै सबैभन्दा प्रतिष्ठित व्यावसायिक नेताका रूपमा स्थापित हुनुहुन्छ।
​”पश्चिम बंगालका माननीय मुख्यमन्त्रीज्यूसँग भेट गरी राज्यको विकासका लागि उहाँका दूरगामी योजनाहरू सुन्न पाउनु मेरा लागि निकै सुखद अनुभव रह्यो। ‘विकसित बंगाल’ का लागि उहाँको दृष्टिकोण प्रेरणादायी र भविष्यमुखी छ। उहाँको ऊर्जा, उत्साह र सानाभन्दा साना विवरणहरूमा पनि विशेष ध्यान दिने कार्यशैली उत्तिकै प्रशंसनीय छ। हामीले पश्चिम बंगालको विकास यात्रा, औद्योगिक वातावरणलाई थप सुदृढ बनाउने, ठूलो मात्रामा लगानी भित्र्याउने, रोजगारीका अवसरहरू सिर्जना गर्ने र राज्यको विश्वव्यापी प्रतिस्पर्धात्मकता बढाउने अवसरहरूका बारेमा फलदायी छलफल गर्‍यौं। प्रगति र समृद्धिको यस साझा यात्रामा योगदान दिन म उत्सुक छु”, डा. गोयन्काले भने।