‘अर्जुन वाहिनी’को औपचारिक शुभारम्भ

​कोलकाता: पश्चिम बङ्गलका मुख्यमन्त्री शुभेन्दु अधिकारीले राज्यको आपदा प्रतिक्रिया प्रणालीलाई थप द्रुत, विशिष्ट र सुदृढ बनाउने दिशामा एक ऐतिहासिक कदम चाल्दै नयाँ राज्यस्तरीय विपद् प्रतिक्रिया बल ‘अर्जुन वाहिनी’को औपचारिक घोषणा तथा शुभारम्भ गरेका छन्।
​प्राकृतिक विपद्को उच्च जोखिममा रहने पश्चिम बङ्गलका हिमाली, तटीय र सहरी क्षेत्रलाई सुरक्षित राख्ने दूरदर्शी सोचका साथ मुख्यमन्त्री अधिकारीको नेतृत्वमा यो नयाँ संयन्त्र तयार पारिएको हो। प्रारम्भिक चरणमा २०० जना प्रशिक्षित जवानहरू सम्मिलित अर्जुन वाहिनीलाई मुख्य तीन अति संवेदनशील क्षेत्रहरूमा परिचालन गरिनेछ, जसअन्तर्गत दार्जिलिङ र कालिम्पोङ पहाडी क्षेत्रमा ५० जना, तटीय क्षेत्रमा ५० जना र कोलकाता सहरी क्षेत्रमा १०० जना जनशक्ति तैनाथ हुनेछन्।
​विशेष गरी पहाडी क्षेत्रमा राष्ट्रिय विपद् प्रतिक्रिया बल (एनडीआरएफ) को उच्च मापदण्डमा प्रशिक्षित जवानहरूलाई आधुनिक उद्धार वाहन र विशेष उपकरणसहित परिचालन गरिने भएकाले दार्जिलिङ, तराई र डुवर्स क्षेत्रको विपद् पूर्वतयारीमा ठूलो बल पुग्नेछ।
​यसैबीच मुख्यमन्त्री शुभेन्दु अधिकारीले हिमाली क्षेत्रको वातावरणीय जोखिम र प्राकृतिक प्रकोपको वैज्ञानिक अध्ययनका लागि एक उच्चस्तरीय विज्ञ समिति गठन गर्ने निर्णयसमेत गरेका छन्। उक्त समितिले हिमताल विस्फोटनबाट आउने बाढी, बादल फाट्ने समस्या, पहिरोको जोखिम, नदी प्रणालीको व्यवहार र सहरी ढल निकासका चुनौतीहरूको सूक्ष्म अध्ययन गरी ठोस र वैज्ञानिक सुझाव प्रस्तुत गर्नेछ। मुख्यमन्त्री अधिकारीको यस रणनीतिक अग्रसरताले विपद् जोखिम न्यूनीकरण र वातावरणीय संरक्षणको क्षेत्रमा राज्य सरकारको प्रतिबद्धतालाई स्पष्ट रूपमा उजागर गरेको छ।