​गुवाहाटी: देशको प्रसिद्ध काजिरङ्गा राष्ट्रिय निकुञ्जमा आगामी २५ मे देखि जीप सफारी सेवा आधिकारिक रूपमा बन्द गरिने भएको छ। मनसुन (वर्षायाम) सुरु हुन लागेकाले पर्यटकहरूको सुरक्षा र निकुञ्जको संवेदनशील पारिस्थितिक प्रणाली (इकोसिस्टम) को संरक्षणलाई ध्यानमा राख्दै वन विभागले यो निर्णय गरेको हो।
​वन विभागका अधिकारीहरूका अनुसार आगामी मे २४ सम्म जीप सफारी सामान्य रूपमा सञ्चालन हुनेछ भने २५ मे गतेदेखि निकुञ्जभित्र पर्यटकहरूको प्रवेशमा पूर्ण प्रतिबन्ध लगाइनेछ। मनसुनका बेला हुने भारी वर्षा, सम्भावित बाढी र हिलोका कारण वन क्षेत्रभित्रका मार्गहरू कमजोर हुने भएकाले यो समयमा सफारी सञ्चालन गर्नु सुरक्षित मानिँदैन।
​हरेक वर्ष मनसुनको मौसममा असमका धेरैजसो राष्ट्रिय निकुञ्ज र वन्यजन्तु अभयारण्यहरूमा पर्यटकीय गतिविधिहरू अस्थायी रूपमा रोकिने गर्छन्। वर्षाका कारण नदीहरूमा पानीको सतह बढ्दा निकुञ्जभित्रका सडकहरू डुबानमा पर्ने र वन्यजन्तुहरूको प्राकृतिक आवागमनमा समेत बाधा पुग्ने गर्दछ।
​यस वर्षको मनसुनको मौसम सकिएर अवस्था सामान्य भएपछि आगामी असोज वा कात्तिक (अक्टोबर वा नोभेम्बर) महिनादेखि मात्र सफारी सेवाहरू पुनः सुरु गरिने वन विभागले जनाएको छ। एकसिङ्गे गैँडाका लागि विश्वभर प्रख्यात यो निकुञ्ज बन्द हुने भएपछि यस सिजनका लागि पर्यटकहरूको आवागमन अब अन्तिम चरणमा पुगेको छ।