​जोरहाट: भारतीय वायुसेना (आईएएफ) को एउटा ‘एएन–३२’ परिवहन (कार्गो) विमान शनिबार असमको जोरहाटस्थित एयरफोर्स स्टेशनभित्रै दुर्घटनाग्रस्त भएको छ। दुर्घटनालगत्तै विमानमा भीषण आगलागी भएको भारतीय सञ्चारमाध्यमहरूले जनाएका छन्।
​प्रारम्भिक विवरणअनुसार सैन्य विमान एयरफोर्स स्टेशन परिसरभित्रै खसेको थियो। घटनालगत्तै उद्धार तथा आपत्कालीन टोलीहरू परिचालन गरी आगो नियन्त्रणमा लिने प्रयास सुरु गरिएको छ।
​भारतीय वायुसेनाले दुर्घटनाको पुष्टि गर्दै क्षतिको विस्तृत विवरण संकलन भइरहेको जनाएको छ। दुर्घटनाको ठोस कारण र मानवीय क्षतिको आधिकारिक पुष्टि हुन बाँकी रहे पनि सुरुवाती रिपोर्टहरूले विमानका पाइलट हताहत भएको आशंका गरेका छन्। वायुसेनाले घटनाको छानबिनका लागि उच्चस्तरीय टोली गठन गरी अनुसन्धान सुरु गरिसकेको छ।
​दुर्घटनामा परेको ‘एएन–३२’ भारतीय वायुसेनाको प्रमुख मालवाहक विमान हो। यसको प्रयोग सैनिक टोली, सैन्य सामग्री र दुर्गम तथा पहाडी क्षेत्रमा आवश्यक बन्दोबस्तीका सामान ढुवानीका लागि गरिँदै आएको छ।