नेतन्याहूको गर्जन: “इरानलाई कुनै पनि हालतमा परमाणु हतियार बनाउन दिँदैनौँ”

​ट्रम्पको सम्झौताले चिन्ता बढायो; इजरायली मन्त्री भन्छन्: “हामी अमेरिकाको अधीनमा छैनौँ”
​
नयाँ दिल्ली: ​अमेरिका र इरानबिच हुन लागेको भनिएको शान्ति सम्झौतालाई लिएर इजरायलभित्र असन्तुष्टि र आक्रोश चुलिँदै गएको छ। इजरायलका विपक्षी नेताहरूले यस सम्झौतालाई देशको विदेश नीति र सुरक्षा रणनीतिको ठुलो असफलता भनी टिप्पणी गरेका छन्। सम्झौताले गर्दा इरानले आर्थिक राहत त पाउनेछ, तर उसको क्षेत्रीय गतिविधि र सैन्य क्षमतामा भने कुनै प्रभावकारी रोक नलाग्ने उनीहरूको आरोप छ। यस विषयमा इजरायलका प्रधानमन्त्री बेन्जामिन नेतन्याहूले संयमित तर कडा प्रतिक्रिया दिँदै इरानलाई परमाणु हतियार हासिल गर्नबाट हरहालतमा रोकिने कुरा स्पष्ट पार्नुभएको छ।
​अमेरिका र इरानबिच शान्ति सम्झौताको घोषणा भइरहँदा अमेरिकी राष्ट्रपति डोनल्ड ट्रम्पले इजरायली प्रधानमन्त्री नेतन्याहूमाथि शब्दप्रहार गरेका छन्। ट्रम्पले नेतन्याहूलाई एक अप्ठ्यारो मान्छे भन्दै उनीसँग सुल्झिनु सजिलो नभएको बताएका छन्। यसैबिच इजरायलका राष्ट्रिय सुरक्षा मन्त्री बेन-ग्वीरले अमेरिका-इरान सम्झौतामाथि कडा प्रश्न उठाउँदै यो सम्झौता मान्न इजरायल बाध्य नभएको स्पष्ट पारेका छन्। उनले इजरायल अमेरिकाको अधीनमा नरहेको र आफूहरू एउटा स्वतन्त्र अनि सार्वभौमसत्ता सम्पन्न राष्ट्र भएको दाबी गरेका छन्।
​इजरायललाई मुख्य डर यो छ कि यो सम्झौता भएपछि इरानमाथि अन्तर्राष्ट्रिय दबाब कम हुनेछ र उसले आफ्नो सैन्य तथा क्षेत्रीय विस्तारवादी गतिविधिलाई अझ बढाउने मौका पाउनेछ। अर्कोतर्फ, अमेरिकाको दाबी छ कि यो सम्झौताले पश्चिम एसियामा जारी तनावलाई कम गर्न र इरानको परमाणु कार्यक्रमलाई सीमित गर्न एउटा महत्त्वपूर्ण कदम साबित हुनेछ। अब यस सम्झौता पछि इजरायलले चाल्ने आगामी कदम र रणनीतितर्फ सम्पूर्ण विश्वको ध्यान केन्द्रित भएको छ।