दार्जिलिङ: गोर्खाल्याण्ड क्षेत्रीय प्रशासन र दार्जिलिङ पहाडका जनताको तर्फबाट जीटीए प्रमुख अनित थापाले पश्चिम बंगालको मुख्यमन्त्रीको पदभार ग्रहण गरेकोमा शुभेन्दु अधिकारीलाई हार्दिक बधाई र शुभकामना व्यक्त गरेका छन्। आज उनले एक पत्र लेखेर शुभकामना व्यक्त गरेका छन्। अनित थापाले आफ्नो पत्रमा भनेका छन्, तपाईंको नेतृत्व ग्रहणले राज्यको लागि नयाँ अध्यायको सुरुवात भएको छ र हामी विश्वस्त छौं कि तपाईंको मार्गदर्शनमा, पश्चिम बंगालसंगै जीटीए क्षेत्र पनि शान्ति, विकास, समावेशीता र प्रगतिको बाटोमा अगाडि बढ्नेछ।
उनले भनेका छन्, जीटीए क्षेत्रमा शान्ति, सद्भाव, स्थिरता र रचनात्मक सहयोग कायम राख्न प्रतिबद्ध छ। मेरो नेतृत्वमा, दार्जिलिङ पहाडहरूले २०१७ देखि कुनै पनि राजनीतिक हडताल वा अशान्तिबिना शान्ति र स्थिरताको निरन्तर अवधि देखेको छ। यो शान्तिपूर्ण वातावरणले पर्यटन क्षेत्रमा अभूतपूर्व परिवर्तन ल्याएको छ, जसले गर्दा भारतभरिबाट, विशेष गरी पश्चिम बंगालका विभिन्न भागहरूबाट पहाडमा पर्यटकहरूको आगमनमा उल्लेखनीय वृद्धि भएको छ।
उनले भने, आज दार्जिलिङ पहाड पर्यटकहरूको लागि सुरक्षित, स्वागतयोग्य र जीवन्त गन्तव्यको रूपमा उभिएका छन् र हामी आगामी वर्षहरूमा शान्ति र जनताको विश्वासको यो वातावरणलाई संरक्षण गर्न प्रतिबद्ध छौं।’