चीनका चार ठूला पर्वहरूमध्ये एक ड्र्यागन बोट फेस्टिभल २०२३ शुरु हुनुअघि पहिलो रात ठूलो घटना भएको छ। चीनको उत्तरपश्चिमी प्रान्त निङ्जियाको यिनचुआन शहरमा बुधबार राति एउटा रेस्टुरेन्टमा विस्फोट भएको छ। यस विस्फोटमा ३१ जनाको मृत्यु भएको र ७ जना घाइते भएको समाचार छ। यद्यपि आधिकारिक तथ्यांक भने सार्वजनिक गरिएको छैन। यिनचुआन फायर ब्रिगेडका अनुसार रेस्टुरेन्टमा धेरै भीड थियो। यसैबीच, विष्फोटपछि आगलागी भयो, जुन चाँडै रेस्टुरेन्टमा फैलियो। घटनास्थलमा पुगेपछि दमकलको गाडीलाई भीषण आगो नियन्त्रण गर्न निकै कठिन भएको थियो।

यिनचुआन सहरको रेष्टुरेन्टमा विष्फोट भएपछि आगो तीव्र गतिमा फैलिएको हुनाले पहिलो नजरमा यसलाई एलपीजी ट्याङ्की चुहावट भएको मानिएको छ। चीनमा विगतमा पनि ग्यास चुहावटका कारण विस्फोट हुने गरेको छ। सन् २०१५ मा शृङ्खलाबद्ध विस्फोटमा १७३ जनाको मृत्यु भएको थियो। चिनियाँ संचारमाध्यम सिन्ह्वाले पनि दुर्घटनाको कारण ग्यास चुहावट भएको बताएको छ। यद्यपि आधिकारिक बयान भने जारी गरिएको छैन। विष्फोटमा धेरै मानिसको मृत्यु हुनुको कारण पनि बिहीबार २२ जूनबाट शुरु भएको ड्र्यागन बोट फेस्टिभल रहेको छ। ड्र्यागन बोट फेस्टिभल, चीनको ठूला चार चाडहरू मध्ये एक, धेरै दिनको लागि सार्वजनिक बिदा हो। जसका कारण बजारमा भीडभाड हुने गरेको छ। यिनचुआनमा पनि विस्फोट हुँदा बजार निकै भीड थियो। जसका कारण विष्फोटमा मृत्यु हुनेको संख्या बढेको छ।

निङ्जिया प्रान्तको ६.८ मिलियन जनसङ्ख्यामा करिब ३६% मुस्लिमको उपस्थितिलाई घटनाको पछाडि आतंकवादी कोण भएको आशंका गरिएको छ। चीनबाट मुस्लिम समुदायविरुद्धको कठोर अडान नयाँ होइन। रमजानमा रोजा राख्ने, लामो दाह्री राख्ने जस्ता धेरै प्रतिबन्ध लगाइएको छ, जसका कारण मुस्लिम समुदायमा विरोधको वातावरण छ।

चिनियाँ सरकारी टेलिभिजनलाई उद्धृत गर्दै बीबीसी हिन्दीले राष्ट्रपति सी जिनपिङले घटनाको हरेक कोणबाट छानबिन गर्न आदेश दिएको बताएको छ। जिनपिङले महत्वपूर्ण उद्योग तथा अन्य क्षेत्रको बजारमा सुरक्षा व्यवस्थालाई सुदृढ गर्न र अनुसन्धान गर्न पनि निर्देशन दिएका छन्। यससँगै यिनचुआन सहरमा भएको घटनामा घाइते भएकाहरुको उपचारको व्यवस्था मिलाउन पनि निर्देशन दिइएको छ।