उत्तर दिनाजपुर: इस्लामपुरका तृणमूल कांग्रेसका विधायक करीम चौधरी पश्चिम बंगालको आगामी पञ्चायत चुनाव अघि एकपटक फेरि विद्रोही बनेका छन्। लामो समयदेखि पार्टीका नेताहरूमाथि गम्भीर आरोप लगाएका चौधरीले अहिले पञ्चायतको निर्वाचनबारे पनि आफ्नो क्षेत्रका पञ्चायतका उम्मेदवारको सूची छुट्टाछुट्टै मुख्यमन्त्री ममता ब्यानर्जीलाई पठाएको बताएका छन्। स्वीकृति नपाएमा उनले आफ्ना समर्थकलाई स्वतन्त्र रुपमा चुनाव लड्न लगाउनेछन्। अहिले मुख्यमन्त्री ममता ब्यानर्जीका भतिजा तथा तृणमूल कांग्रेसका राष्ट्रिय महासचिव अभिषेक ब्यानर्जीले पञ्चायतमा उम्मेदवार छनोट गर्न पदयात्रा गरिरहेका छन्। उनले उत्तर दिनाजपुर गएर करिम चौधरीलाई मनाउन खोजेका थिए। उनले जिल्ला अध्यक्ष कन्हाइ लाललाई चौधरीसँग समन्वय गरेर काम गर्न निर्देशन दिएका थिए। तर, करीम चौधरीले कन्हाइ लालले आफूसँग कुनै सम्पर्क नगरेको बताएका छन्। भाइरल भिडियोमा चौधरीले पार्टीका लागि आफ्नो सम्पूर्ण जीवन अर्पण गरेको र कसैको बलमा जनप्रतिनिधि नबनेको बताइ रहेका छन्। जिल्लाका कन्हैलाल र अन्य तृणमूल नेताहरूमाथि गम्भीर आरोप लगाउँदै उनले राज्य सरकारका योजनाहरूमा ठूलो मात्रामा भ्रष्टाचार भइरहेको बताए। पञ्चायतको कोष पनि दुरुपयोग भएकाले सफा छवि भएका उम्मेदवारलाई टिकट दिन चाहन्छन्। उनको यो भिडियो एक दिन अघि अर्थात शनिबारको हो।