नयाँ दिल्ली: स्टुडेन्ट्स फेडेरेसन अफ इण्डिया (एसएफआई) का कार्यकर्ताहरूले वायनाडमा कांग्रेस नेता राहुल गान्धीको कार्यालयमा तोडफोड गरेको समाचार छ। तोडफोडमा कार्यालयको सामानहरु क्षतिग्रस्त भएको छ। कार्यालयमा कार्यरत कर्मचारीलाई समेत चोटपटक लागेको कांग्रेसको दाबी छ। सर्वोच्च अदालतको हालैको फैसलाबाट एसएफआईका कार्यकर्ताहरु आक्रोशित भएको बताइएको छ। उनीहरूले यस विषयमा राहुल गान्धीको धारणा जान्न चाहन्थे, जसले अहिलेसम्म कुनै प्रतिक्रिया दिएका छैनन्। त्यही कारणले यो प्रदर्शन निकालिएको थियो र एसएफआईका कार्यकर्ताहरूले राहुल गान्धीको कार्यालयमा तोडफोड गरे। उक्त घटनाको भिडियोमा केही प्रदर्शनकारी कार्यालयको झ्यालको छेउबाट भित्र पस्न खोजिरहेका छन्। अर्को भिडियोमा पुलिसले प्रदर्शनकारीलाई घटनास्थलबाट उठाएर हिरासतमा लिएको देखिन्छ। केहि दिन अघि सर्वोच्च अदालतले वातावरणलाई लिएर ठूलो फैसला दिएको थियो। निर्णयले संरक्षित वन, वन्यजन्तु अभयारण्य वरपरको एक किलोमिटरको सम्पूर्ण क्षेत्रलाई इको सेन्सेटिभ जोन (इएसजेड) बनाउने स्पष्ट पारेको छ। ईएसजेडमा हुने सबै गतिविधिलाई नियन्त्रण गर्न सर्वोच्च अदालतले यस्तो निर्णय गरेको हो।

तर केरलामा विवाद यो छ कि यदि यो नियम त्यहाँ कडाईका साथ लागु भयो भने इको सेन्सेटिभ क्षेत्रमा बसोबास गर्ने जनताको हालत के होला, कहाँ जाने? यस मुद्दालाई लिएर एसएफआईका कार्यकर्ताहरूले वायनाडमा प्रदर्शन गरेर राहुल गान्धीको विचार जान्न खोजेका थिए। यद्यपि राहुल गान्धीले यस विषयमा अहिलेसम्म मिडियासँग बोलेका छैनन् तर उनको तर्फबाट प्रधानमन्त्री नरेन्द्र मोदीलाई पत्र लेखिएको छ। उक्त पत्रमा राहुल गान्धीले सर्वोच्च अदालतको फैसलाले वायनाडका स्थानीय जनताको चिन्ता निकै बढेको बताएका छन्। यो एउटा निर्णयका कारण खेतीपाती र अन्य काममा फरक पर्ने देखिएको छ। यस्तो अवस्थामा वातावरणसँगै जनताको सहजता र जीविकोपार्जनको पनि ख्याल गर्न प्रधानमन्त्रीलाई उनको तर्फबाट अपिल गरिएको छ।