दार्जिलिङ: आज बैंक अफ् बडोदाले “बैंक अफ बडोदा राष्ट्रभाषा सम्मान अवार्ड २०२३ को पहिलो संस्करणको लागि १२ मनोनयनहरूको सूची घोषणा गरेको छ। नेपाली भाषाको उपन्यास ‘फात्सुङ’ पुरस्कारका लागि मनोनित १२ उपन्यासहरूको सूचीमा परेको छ। विभिन्न भारतीय भाषाहरूमा (संविधानको 8” अनुसूची अन्तर्गत समावेश गरिएको) साहित्यिक कार्यहरूलाई मान्यता र प्रवर्द्धन गर्नका साथै अनुवादको माध्यमबाट हिन्दी पाठकहरूका लागि उत्कृष्ट भारतीय साहित्य उपलब्ध गराउन र रूचिलाई फराकिलो बनाउन यो अद्वितीय पुरस्कार स्थापना गरिएको हो।
बैंक अफ् बडोदा राष्ट्रभाषा सम्मान अवार्ड मौलिक कृतिका लेखक र पुस्तकको हिन्दी अनुवादकलाई प्रदान गरिनेछ। मौलिक कृतिका लेखक र पुरस्कार विजेता पुस्तकका सम्बन्धित हिन्दी अनुवादकले रुपियाँ २१ लाख र रुपियाँ १५ लाख पाउनेछ। यसको साथै छनौटमा परेका पाँच पुस्तकका लेखक र हिन्दी अनुवादकले रुपियाँ ३ लाख र रुपियाँ प्रत्येक क्रमश रुपियाँ २ लाख प्रदान गरिने जानकारी प्राप्त भएको छ।
आज दार्जिलिङमा आयोजित कार्यक्रममा मौलिक लेखक छुदेन काबिमो र अनुवादक नम्रता चतुर्वेदी प्यानल छलफलमा सहभागी भएका थिए। लेखकहरूले भारतीय साहित्यिक परिदृश्य र साहित्यिक बिरादरीका लागि राष्ट्रभाषा सम्मान पुरस्कारको महत्व विषयमा चर्चा परिचर्चा गरेका थिए। छुदेन काबिमोको फात्सुङले हामीलाई पहाड़ी समुदायको हृदयमा लैजान्छ किनकि यसले आशा, आकांक्षा र तिनीहरूका चकनाचुर सपनाहरू जाँच्छ: फातसुङ माटो र जीवनको सासको कथा हो।
उपन्यासले भाषा र संस्कृतिको सिमाना नाघेर मानवताको कथा बताउँछ र पाठकको मन छुन्छ।
सो अवसरमा बोल्दै सोनम छिरिङ भुटिया, क्षेत्रीय प्रमुख र महाप्रबन्धक, बैंक अफ् बडोदाले भने, “भारत एक विविधतापूर्ण देश हो र संस्कृति, धर्म र भाषाहरूको मुख्य क्षेत्र हो। यस पहलमार्फत् बैंकले भारतीय भाषाहरूमा साहित्यलाई प्रवर्द्धन गर्ने र हाम्रो देशको बहुसांस्कृतिकतालाई सुदृढ गर्ने लक्ष्य राखेको बताए।
बैंक अफ बडोदा राष्ट्रभाषा सम्मान पुरस्कार देशका विभिन्न भागका प्रतिभाशाली भारतीय लेखकहरूको लागि एक राष्ट्रिय प्लेटफर्म हो र यस पहलले भारतीय भाषा साहित्यलाई अझ बढावा दिनुका साथै साहित्यिक अनुवादहरूलाई प्रोत्साहन दिनेछ।”
पाँच सदस्यीय पुरस्कार निर्णायक मण्डलको अध्यक्षता प्रख्यात लेखिका र बुकर पुरस्कार विजेता गीतन्जा श्रीले गरेका छन्। अन्य चार निर्णायक सदस्यहरू अरुण कमल, एक भारतीय कवि, पुष्पेश पन्त, एक शैक्षिक र इतिहासकार, अनामिका, एक समकालीन भारतीय कवि र उपन्यासकार र प्रभात रञ्जन एक हिन्दी कथा लेखक र अनुवादक हुन्।
बैंकले मार्च-अप्रेल २०२३ को अवधिमा मनोनयनहरू आमन्त्रित गर्ने प्रक्रिया सुरु गरेको थियो र विभिन्न भारतीय भाषाहरूमा लेखिएका धेरै प्रविष्टिहरू प्राप्त गरेको थियो, जसबाट निर्णायकले पुस्तकहरूको सूची तयार गरेको थियो। बैंक अफ् बडोदा राष्ट्रभाषा सम्मान’ पुरस्कारको विजेता दिल्लीमा जुन २०२३ को मध्यमा घोषणा गरिने जानकारी प्राप्त भएको छ।