कुनै पनि पुस्तकालयबाट पुस्तक लगेपछि प्रायः मानिसले तोकिएको मितिमा नै पुस्तक फिर्ता गर्नुपर्ने हुन्छ। तर, एकजना यस्ता व्यक्ति भेटिएका छन् जसले दशकौँपछि पुस्तक फिर्ता गरेका छन् भन्ने सुन्दा अनौठो लाग्छ। क्यानडाको भ्यानकुभरमा यस्तै घटना भएको छ। त्यहाँको सार्वजनिक पुस्तकालयले आफ्नो इन्स्टाग्राम अकाउन्टमा एउटा तस्वीर सेयर गर्दै ५१ वर्षपछि एउटा किताब ठ्याक्कै उस्तै अवस्थामा फर्किएको जनाएको छ। किताबसँगै एउटा मन छुने नोट पनि पठाइएको छ। ‘तपाईको पुस्तकालयबाट। धेरै माफ गर्नुहोस् यो अलि ढिलो भयो। ५१ वर्ष भयो। तर, धेरै राम्रो अवस्थामा छ। धन्यवाद।’, नोटमा यसरी भनिएको छ। भ्यानकुभर पब्लिक लाइब्रेरी अफ साउथ हिलले सार्वजनिक गरेको तस्वीरअनुसार ‘द टेलिस्कोप’ नामको पुस्तक ह्यारी एडवर्ड निलले लेखेका हुन्। पुस्तकभित्रको कार्डमा लगाइएको छापमा पुस्तक बुझाउने अन्तिम मिति सन् १९७१ को २० अप्रिल उल्लेख छ। पुस्तकको तस्बीर पुस्तकालयले जुन ७ मा क्याप्ससहित सेयर गरेको थियो। क्याप्सनमा लेखिएको छ, ‘यस पुस्तकमा भएको यस्तो रमाइलो नोट हाम्रो दक्षिण हिल शाखामा केही ढिलो (५१ वर्ष!) पछि फर्कियो।’