बैंगलोर: भारतको जी-२० अध्यक्षतामा व्यापार र लगानी कार्य समूह (टीआईडब्ल्युजी)को दोस्रो बैठक बेंगलुरुमा शुरु भयो। यो बैठक २३ देखि २५ मईसम्म हुनेछ। कार्यक्रमको पहिलो दिन व्यवसाय र प्रविधि सम्बन्धी गोष्ठी आयोजना गरिएको थियो, जसमा व्यवसायलाई प्रविधिको पुन: आकार दिने र समावेशी वृद्धिमा प्रविधिको भूमिका जस्ता विषयमा छलफल भएको थियो। यसअघि बैठकमा सहभागी हुन आएका विदेशी प्रतिनिधिहरुलाई बैंगलोरमा भव्य स्वागत गरिएको थियो।

गोष्ठीको पहिलो दिनमा जी–२० सदस्य राष्ट्रका प्रतिनिधि, आमन्त्रित राष्ट्र र व्यापार तथा प्रविधिसँग सम्बन्धित क्षेत्रीय तथा अन्तर्राष्ट्रिय संघसंस्थाका प्रतिनिधिहरुले यी विषयमा छलफलमा भाग लिएका थिए। गोष्ठीमा दुई प्यानल छलफल पनि आयोजना गरिएको थियो। यसअघि केन्द्रीय वाणिज्य तथा उद्योग राज्यमन्त्री सोम प्रकाशले गोष्ठीको उद्घाटन गरेका थिए। सो अवसरमा बोल्दै केन्द्रीय वाणिज्य तथा उद्योग राज्यमन्त्रीले व्यापार तथा लगानी कार्यदलको दोस्रो बैठकले राम्रो भविष्य र साझा समृद्धिका लागि अन्तर्राष्ट्रिय व्यापारमा परेका अवरोध हटाउन काम गर्ने विश्वास व्यक्त गरे। मन्त्रीले विश्व व्यापारमा रहेका अवरोध र चुनौती हटाउन उद्योग, प्राज्ञ, अनुसन्धान तथा विकास संस्थाका प्रतिनिधि र सरकारी अधिकारीले मिलेर काम गर्ने बताए।

भेलालाई सम्बोधन गर्दै वाणिज्य विभागका सचिव सुनिल बर्थवालले भारतीय विदेश व्यापार नीतिले ई–कमर्समा जोड दिएको र अर्थतन्त्रको डिजिटलाइजेशनलाई प्रवर्द्धन गर्न, प्रत्यक्ष लाभ स्थानान्तरणको प्रवर्द्धन गर्न र बैंक खाता र मोबाइल फोनसँग आधार लिंक गर्न प्रतिबद्ध रहेको बताए। गोष्ठी पछि जी-२० प्रतिनिधिहरूको लागि सांस्कृतिक कार्यक्रम थियो।

तीन दिने कार्यक्रममा जी-२० सदस्य राष्ट्रहरू, आमन्त्रितहरू, क्षेत्रीय समूहहरू र अन्तर्राष्ट्रिय संगठनहरूका ७५ भन्दा बढी प्रतिनिधिहरू सहभागी छन्, जसले आउँदो दुई दिनमा विश्वव्यापी व्यापारसँग सम्बन्धित विभिन्न विषयहरूमा व्यापक छलफल गर्नेछ। डब्ल्यूटीओ सुधार, जुन भारतको जी-२० अध्यक्षताको लागि मुख्य प्राथमिकता रहन्छ, २४ मईमा हुने प्राविधिक सत्रमा केन्द्र बिन्दु हुनेछ। २४ मईमा हुने उद्घाटन समारोहमा केन्द्रीय वाणिज्य तथा उद्योग राज्यमन्त्री अनुप्रिया पटेल उपस्थित हुनेछन्। टीआईडब्ल्युजीको पहिलो बैठक मुम्बईमा भएको थियो।