नक्सलबारी: चियाश्रमिकहरूलाई जमिनको अधिकार प्रदान गरिनुपर्ने, लिज होल्ड जमिनलाई फ्रि होल्ड जमिन गरिनुपर्ने मागमा गर्दै ३२ वटा संगठनलाई लिएर गठन गरिएको जोइन्ट फोरमले आज प्रतिवाद रेली निकाल्यो। जोइन्ट फोरमले आज नक्सलबारीको स्कुलडाङ्गीबाट प्रतिवाद रेली निकालेर नक्सलबारीको पानीघट्टा मोडसम्म पुगेर भूमि तथा भूमि राजश्व विभागमा विक्षोभ प्रदर्शन गर्नको साथै अधिकारीसित भेट गरेर एउटा ज्ञापन पत्र पनि चढायो। प्रदर्शनकारीहरूको आरोप अनुसार धेरै समय अघिदेखि आफूहरू यस इलाकामा बसोबास गर्दै आइरहे तापनि सरकारले श्रमिकहरूलाई जमिनको अधिकार दिएको छैन। यसको साथै लिज होल्ड जमिनलाई फ्रि होल्ड जमिन बनाएर चियाकमानको जमिन गैर सरकारी संस्थालाई सुम्पेको छ। चियाकमानका श्रमिकहरूलाई आफ्नो अधिकारबाट वञ्चित गरिरहेको छ। चियाश्रमिकहरूको अधिकार नदिएको खण्डमा आगामी दिनमा सडकमा ओर्लिने संयुक्त फोरमका सदस्य गौतम घोषले चेताउनी दिएका छन्।